ان الي حرق المجمع العلمي اكيد مش عارف قيمتة واكيد شغله الشاغل سواء قبل الثورة او بعدها هو البلطجة وأن الي حرق الكتب والأبحاث وهو نفسه الي كان حاططهم على الأرفف اكتر من تلاتين سنة من غير مالشعب يعرف مكانهم او قيمتهم او يستفاد من قيمتهم عالم او طالب علم او حتى الشعب يعرف المبنى الي اتحرق كان مبنى ايه !!!
نفسي اقول
ان من المستحيل ان يكون ابن قيادي في حزب الفلول المنحل هيكون من الثوار ولا ناشط زي مابيدعوا لانه بكل بساطة هيكون بينه وبين الثوار مسافة مابين السماء والأرض ووجوده بين المعتصمين السلميين وضح وبين ان فيه فلول متخفيين لصالح ولمصلحة مين ؟؟؟
الرشوة او الي بيسموها الإكرامية او الشاي من الأمور المنتشرة جدا في المجتمع المصري والي بيحللها بعض والشيوخ تحت مسمى مساعدة بسيطة في ظل غلاء المعيشة والي مابيتكلمش عنها خالص بعضهم ومش فاضين إلا للتجارة بالدين عن طريق البرامج الي بتحقق لهم ملايين والإستخفاف فيها بعقول البسطاء ونسيوا ان هدفهم الأول هو نشر تعاليم الدين الإسلامي في المجتمع الذي اصبح نسبة ليست بقليلة منه لاتفرق بين الحلال والحرام .
اسدال من نار
في احد المحاكم والي بدخل فيها وبخرج منها خسرانة فلوسي وبوفر أي دخل زائد علشان اقدر ادفع الرشاوي
للموظفين والموظفات جوة المحكمة اقصد الإكراميات علشان يشوفوا شغلهم و علشان شغلي يخلص ويمكن الغالبية
منهم
على جبهتهم علامة الصلاة مش عارفة إزاي ..
وإلي يغيظ لما موظفة لابسة اسدال وعاملة له جيب وسوستة علشان
الفلوس ماتقعش منه ومابتعملش شغلة واحدة وياريتها بتعرف الا بفلوس والمصيبة الكبيرة انها بتبوس الفلوس إلي بتاخدها وتحطها في جيب الاسدال وطبعا علشان الرشوة تبقى شرعية القرآن جوة الأودة الي فيها الموظفة مابيتقطعش من أول ساعات العمل من وياريت بتاخد خمسة جنية ولاعشرة جنيه لاااااااااااااااااوياسلام بقى لما بتقوم تمشي ببطئ علشان تمضي ورقة واحدة مش بتقدر تسيب المكتب الا للحظات قليلة والفلوس الي بتملئ بيها جيب اسدالها واهو كله شرعي والرشوة حتبقى محللة علشان هي مسلمة ولابسة اسدال وحتعفى من العقاب .
الصلاة يامرتشين
وقت الصلاة بعد أذان الظهر في أي محكمة تلاقي كل الموظفين الرجالة بيهرولوا على مكان الصلاة والصفوف متساوية والي كان من عشر دقايق مش عجباه فلوس الرشوة على تصوير محضر وإلي بيتخانق مع محامي أو مواطن بسيطعلشان مدفعش رشوة وغيره .. وسبحان الله تلاقي فيهم الي بعد نهاية الفرض بيصلي كمان ركعتين والي قاعد بيسبح واهو كله شرعي يمكن الصلوات مكفرات لما بينها بما فيها الرشوة الي بنص حديث صحيح ملعون فيه الراشي والمرتشي ولا الحديث ده لأمة تانية غير المسلمين واهو كله شرعي.
مشايخ الفضائيات
بعد ظهور السادة الدعاة الجدد ودخول الإسلام مصر من خمسة وعشرين سنة فقط على ايد الجماعات السلفية
المحترمة الي نشرت الفساد وقننته تحت شعار الدين وهمشت لا .. الغت دور الأزهر الشريف في الدعوة تقريبا
كل ماافتح برنامج ديني الاقيه بيتكلم عن قشور قشور ومظاهر دينيةالنقاب فرض تقصير الثوب تطويل الثوب
الجواز الطلاق .
لكن ايها السادة الدعاه اين الدين المعاملة أين مكارم الأخلاق .. ؟؟
هو المسلم مباح ليه انه يرتشي ويسرق الي في جيب غيره غصب ويرغمه على كدة تحت مسمى فاسد زي الإكرامية والشاي والمساعدةوغيرها من التحايل على الدين أيه رأيكم في الموظفة ديه حلال ولا حرامالفلوس إلي بتاخدها من الناس ولا حتعفى من العقاب الي والي بيصلوا وبيرتشوا صلاتهم مقبولة بردهعلشان مسلمين مش حاقول غير حسبنا الله في كل مرتشي ومرتشية لأنهم عار على الدين واصبح المجتمع بيدعمهم وبيساندهم وبيشجعهم على الرشوة المتفشية في كل مكان تقريبا تحت مسميات مختلفة و فساد لايمكن اصلاحه ابدا .
صور الشبورة المائية على الطريق الزاعي التقطتها الساعة 7 صباحا وانا مسافرة على الطريق اول مرة في حياتي اشوف سحب مائية على مسافات قريبة جدا من الأرض وبتلمسها وطبعا كنت مرعوبة !!!
لأن الشبورة ماكنتش عارفة تعدي ولاتروح فين !!!
من المقطورات والترلات والنقل الثقيل الي بتسلم على العربيات الملاكي والأجرة والناس الي بتعدي على الطريق شمال ويمين في ظل عدم وجود المرور والوعود الخيالية بمنع وتقنين مرورهم وبعد مرور ساعات قررت الشبورة انها تنام مكانها لأنها معرفتش تعدي الطريق ولا تسافر تشوف شغلها ..
وفي النهاية المرور اصدر بيان يتمنى للشبورة انها تعود تاني يوم على أمل تعرف تعدي الطريق اوتسافر مكان ماعايزة تروح وبيقولها خلي بالك على النقل التقيل والترلات والمقطورات واسمعي الكلام وحافظي على النظام احسن ماتدفعي غرامة ونقول بتخالف القوانين ..
انت دايما كدة مزعلة الناس الي وزنهم تقيل ومابيبصوش على الطريق وهما سايقين علشان دماغهم عالية وعارفين انهم كدة كدة راجعين ولابتهمهم حوادث ولا ارواح ولابني آدمين .
كنت اجلس في احدى قاعات المحاكم في احد الدوائر ومنتظرة منادة رقم قضيتي ومتابعة ومستمعة جيدا لرئيس الدائرة وفجأة نادى الحاجب على واحد اسمه حامد وقامت سيدة كاملة الملامح الأنثوية وسألها القاضي انت حامد قالت نعم بصوت منخفض ولقد ظننت للوهلة الأولى انها متحولة الجنس من ذكر إلى أنثى حيث أن اسم حامد يطلق على الذكور فقط . وتكرر الحال في العديد من المرات محمدوعلي واحمد... وغيرها من الاسماء الذكورية ..
هل كل تلك النسوة متحولات من ذكر إلى انثى؟ لا واذا بشر احدهم بالانثى ظل وجهه مسودا وهو كظيم
وبعد بحث ...... وجدت بأن كل تلك النسوة اما كن اول مولودة لأبيها وخوفا من معايرته وحتى يستطيع ان يشعر برجولوته ويمحو الخزي والعار أطلق عليها أسم ذكر حتى يسطتيع الإجابة على الناس بأنه رزق بمولود أسمه محمد اوحامد او على أما انه لم يكن يريد ان يرزق بأي بنات لأنه لايحبهن وخوفا من أن يلقب بأبو البنات فيطلق عليهن أسماء ذكور خوفا من المعايرة لأن البنات من وجهة نظر المجتمع المحيط به عار وستجلب له الفضائح والمصايب وكيف سيرفع رأسه بين أقاربة الذين ينجبون الذكور .
منذ اسابيع قليلة قرأت عن احالة اوراق قاتل 5 من بناته في احدى محافظات صعيد مصر الى المفتي بعد ايداعة تحت الملاحظة في مستشفى الأمراض العقلية حيث كان يحلق لهن شعورهن مثل الأولاد ويكبلهن في السرير ويمنعهن من الخروج لانه كان يكره البنات ورزقه الله بسبعة بنات وبالطبع كان المجتمع يصفه بأبو البنات ويعايره ببناته اللاتي سوف يجلبن له العار ويدفن رأسه في الرمال .
وصف المجتمع للمرأة وصف المجتمع للمرأة بما ليس فيها جعل منها سلعة لمن يدفع اكثر جعلها كائن لايعلم هويته كائن رخيص وخاصة في اوساط مجتمعية محددة حين ترزق اسره بالأنثى لاتهتم بها اوتلقنها دروس في كيفية انها تنشأ كائن صالح مثلها مثل الذكر وأنها بعلمها وادبها ودينها تكون شريكته في الحياة بلى فهى تلقنها دروسا في خدمة اخواتها الذكور واذا اصاب احدهم مكروه فأنها تتلقى علقة ساخنة ولاتأكل مثلهم ولاتعالج مثلهم إذا مرضت لانها في منزلة أقل منهم وحتى عندما تتلقى تعليمها فإن التعليم معها ليس إلا تحصيل حاصل وحينما تنمو وتبلغ مرحلة الأنوثة تتلقى دروس فنون كيفية جذب العريس بشتى الطرق و الذي حين يأتي يدفع فيها بضعة جنيهات كالبضاعة وليس بمهم مهنته سواء كان لص أو مدمن او عاطل حتى او ماسيفعله بها ففي النهاية هذا هو دورها في المجتمع العشوائي الذي اصبح يحيط بنا من كل جانب .. فالمجتمع سيتحمل نتيجة اخطأه وافكاره ومعتقدات العصور السحيقة ويجنيها تخلف وفقر وتدهور اخلاقي .
المشاركات
