الجمعة، 31 أكتوبر، 2008

مفاجأة في قضية جلد الطبيب المصري في السعودية

مفاجأة في قضية جلد الطبيب المصري في السعودية ..
"الاستئناف" رفع العقوبة بالسجن من 7 الى 15 عاما

( الحوار الذي أجراه برنامج 90 دقيقة حول وضع الطبيب)


ماتموت من الجوع ... أعملها إيه !!



في يوم من يومياتي المأساوية بداخل المحكمة



كانت عندي موكلة ظروفها صعبة جدا والدها ووالدتها توفوا وسابوا لها أخوات بنات وما أستخرجتش لا إعلام وراثة ولا أورق رسمية ومصرفتش معاش والدها من سنتين .



المهم البنت أضطرت تشتغل في محل بمبلغ 150 في الشهر علشان احتياجتها ومع العلم إن لها أخت مريضة ومحتاجة دواء لا ينقطع وأخوات في مراحل التعليم المختلفة .وجت لي القضية وطبعا نظرا لظروفها الصعبة كان لازم أخلص الورق واعمل حكم بالحجر لصالح الأخت المريضة واعلام وصاية للأخوات القصر إلي في المدارس ووراثة للجميع في وقت قصير علشان المعاش والمستحقات ما يضيعوش .



وابتدا المشوار داخل المحكمةالباشا أمين السر في المحكمة مش طايق نفسة والرشوة بتاعته أسفة (أقصد الإكرامية ) بتختلف.المهم أعلنت قرايبها وخلصت الأوراق وقدمت حافظة المستندات ، وكلمت القاضي وشرحت له الظروف الصعبة الي البنت بتمر بيها وتفهم الوضع وهو بيأخد حفظة المستندات .



الجلسة تأجلت لإعادة الإعلان وضم قضية الحكم في قضية الحجر وحصل ماكان ، تاني يوم رحت أسأل عن ميعاد الجلسة قال لي الجلسة يوم كذا واداني التاريخ تمام .. تمام وشفت بعيني التاريخ .رحت اليوم الي حدده أمين السر لقيت الدعوة أتشطبت ليه إزاي ؟



الباشا أمين السر ماخدش حقة تالت ومتلت ومعاه القلم إلي القاضي بيكتب بيه .. وفي إيده كل شئ .حرام عليك طب قول من الأول أنت عاوز كام ديه البنت وأخواتها متبهدلين ومعروض عليها تشتغل في بار جوة فندق تشيل على إيديها خمور يرضي مين إنها تشتغل كدة !



وكان الرد الغير المتوقع والي خلاني أكلم نفسي

ماتموت من الجوع



.. أعملها إيه يعني .. أحنا ناقصين واحدة فقيرة تفقرنا بفقرها .. ولا أقولك خليها تشتغل في البار أجدع لها !!!!!!!!!!! وبعدين دا أنتي عاملة قضية حجر يعني فيها فلوس كتير .



أفهم .. الحجر ده علشان إنسانة مريضة مابتنزلش من بيتها ولا تملك زمام نفسها من 20 سنة وقعيدة ومش حاسة بحاجة حواليها .. اختها هي الي حتصرف المعاش بدل منها يعني قضية روتينية وغير كدة انا ما احبش اعملها وماليش خالص في الأحوال الشخصية ولا محاكم الأسرة من أصله .



والحــــــــــــل

فكرت مع نفسي ثواني وأنا واقفة قلت لنفسي لودخلت لوكيل النيابة أو رئيس المحكمة ، حيعند معاياوكل الشغل حيبوظ وانا محتاجة الوقت علشان نلحق نقدم الورق في المعاشات .طيب شوف ادي طلب بفتح باب المرافعة وادي مبلغ من تحت الكارنيه كده تمام وإنشاء الله اعدي عليك الأسبوع الجاي أشوف إيه إلي تم فيه ..
وتم فتح باب المرافعة وتم الحكم في أول جلسة .



ورحت آخد أوراق الآحكام من أمين السر


السلام عليكم
..وعليكم السلام يابهية
مين بهية ديه تقصدني أنا .. أنا ما أسميش بهية وأنت عارف كدة كويس .. وبأسلوب شديد اللهجة أنا أسمي قدامك في في الكارنيه وتناديني بيا أستاذة وأسمي الحقيقي وتكلمني بأسلوب مهذب .. بهية ديه هناك بتقعد معاك على المسطبة
ولا تحب صوتي يعلى وندخل لرئيس المحكمة لأني سكت عليك كتير قوي .. كفاية الي حصل والعطلة إلي أتعطلتها بسببك .أسف ياأستاذه كنت بهزر واللهالهزار ده تهزره مع واحدة تعرفها من الشارع لكن أنا لأ أنت فاهم ولا تحب تشوف 10 وشوش تانيةكان واقف زميلات وأستغربوا من الحوار طيب براحة ياأستاذة .. مافيش براحة أهي الكلمة ديه هي إلي بتجيب ورا
أنا فاض بيا الكيل كفاية لغاية كدة ، وهو ساكت خالص منطقش كلمة .



أستلمت الأحكام بعد طبعا ما أخد فلوس كالعادة وخرجت من المحكمة وأنا نفسي أشم هواء نظيف وطبعا الهواء كلة كان ملوث بس أنظف من الهواء الي شميته عند الجشع أمين السر .للأسف الناس ديه الدنيا لهياهم والجشع والطمع وناسيين إن ربنا رقيب عليهم مابتيقوش ربنا وعارفين إن فيه يوم حساب .وللأسف فيه ناس جوة المحكمة الي جوزها مات أو أبوها وبطلع اعلام وراثة ومعاها أيتام معهاش حتى تصرف عليهم إلا الفتات ، وجوة المحكمة من الساعي لأمين السر بيستغلوها وياخدوا قوت الأيتام مش مشكلة بقى يموتوا من الجوع ولا مصدر الفلوس ديه منين .. أقول إيه .. حسبنا الله ونعم الوكيل مابينفعش.
.


وللحديث بقية

الخميس، 30 أكتوبر، 2008

شعبنا يامقلوب حاله .. كلنا نهى رشدي



حقيقي إحنا شعب بيستخبى ورا المظاهر .. لوكانت نهى رشدي المصرية ، من أي مكان على وجهه الكرة الأرضية ، كنت حأيدها واحترمها .. يكفي أنها دافعت عن نفسها بكل شجاعة وماوفقتش أنها تكون ضحية إنسان لا عنده أخلاق ولاقيم .. ولا لوكانت استسلمت كنا وقفنا نتفرج ونصفق للمتحرش وساعتها تبقى عاقلة ماهو كل شئ مقلوب حاله عندنا .

دفاع المتهم
دفاع المتهم .. اتهم نهى وصاحبتها أنهم ماشيين يتقصعوا في دفاعه ؟
وهو عارف كويس
الي ماشيين يتقصعوا دول بييجوا منين
وبنشوفهم في المحاكم في قضايا الآداب من بيئة فاسدة لا عندها دين ولا اخلاق ولا قيم ..
و بيستخبوا في الدين زي الحرامي .. والدين برئ منهم وعذابهم في الدرك الأٍسفل من النار .



_ حلو المنظر إلي في الصورة ده هو ده الإحترام وتعمل بلاوي بعد كدة مش مهم طالما محجبة ولابسة الزي الرسمي علشان ترضي الناس بس .. ونسيت إن الله سبحانه وتعالى شرع الحجاب لصيانتها ولسترها وإن رضا ربنا فوق رضا أي مخلوق .


_ والبنات الي في حادثة تحرش المهندسين هربوا زي النعامة الخايفة ودفنوا راسهم في الرمل .. يعني لو كانوا أعلنوا عن نفسهم كانوا حيبقوا مش طبعيين برده علشان بيدافعوا عن نفسهم .



_ ماحدش ليه بيتكلم لما بيشوف البنات إلي واقفة وقاعدة في أوضاع مش محترمة مع الشباب على الكورنيش وفي الحدائق العامة والمواصلات وبيروحوا البيت البراءة في عيونهم قدام أهاليهم ولا الغلط صح والوضع مقلوب .. ولا الشرطة مابتأخدهمش ليه على أي قسم وبتتصل بأهلهم وتتعهد عليهم بحسن تربيتهم لأنهم يخدشون الحياء العام ده لوفيه حياء من أصله .. ولو ملهمش أهل يبقى فيه إجراءات تانية ولا منظرهم حلو .

_ الدفاع عن النفس والعرض والسمعة مش محتاج ان البنت تبقى محجبة أوغير ، بنت أوولد ، مسلمة أوغير، مصرية أو هندوسية ،الدفاع عن الجسم والنفس نتاج نفس سوية ترفض السؤ والقبح ونتاج تربية سليمة وارتباط بالدين والعادات والتقاليد .

_ مين الي ورا الحملة المغرضة ديه مين إلي عاوز ينشر الفساد الأخلاقي على المشاع من غير مايكون فيه عقاب رادع ويستخبى تحت ستار الدين والدين برئ منه.




.. إن شاء الله حاكتب عن حقائق عشتها بنفسي ، وشفت اد ايه شعبنا شعب مظاهر وإشاعات وسلوك متخلف ومنحدر والمرحلة الي وصلنا لها وبنستخبى فيها ورا الدين واحنا ماينطبقش علينا غير مسلمين لقب وبس وشرقيين ،عندنا عادات وتقاليد على الورق وفي الرويات والأساطير القديمة بس .



.... حسبنا الله ونعم الوكيل ....





كلنا نهى رشدي




وللحديث بقية

نهى رشدي تحمل الجنسية الإسرائلية .. وشريف جبريل بقى شجيع السيما



محامية نهي رشدي تتخلي عنها وتقرر استئناف الحكم لصالح المتهم


فجرت نجلاء الإمام، المحامية بالنقض، مفاجأة في قضية التحرش الجنسي، التي كانت تتولي فيها الدفاع عن المدعية نهي رشدي، عندما أعلنت أنها قررت استئناف الحكم لصالح المتهم.
كانت المدعية - وهي مخرجة أفلام تسجيلية - قد اتهمت الشاب شريف رجب جبريل، بالتحرش بها في يونيو الماضي، حيث ألقي القبض عليه وأحيل للنيابة، وعاقبته محكمة الجنايات بالسجن ٣ سنوات .


وقالت نجلاء لـ «المصري اليوم»، إنها توصلت لمعلومات عن المدعية، جعلتها تقرر التخلي عنها بعد ٣ أيام من صدور الحكم، هي أن «نهي» من عرب ٤٨ ومولودة في يافا شمالي تل أبيب وتحمل جواز سفر إسرائيلياً،كما سبق أن اتهمت ضابطاً فرنسياً بالتحرش بها أثناء وجودها في فرنسا قبل عام ونصف، وحصلت منه علي تعويض. وأوضحت المحامية تفاصيل معرفتها بهذه المعلومات.


وقالت إنها كانت معها في مقابلة تليفزيونية علي قناة M.b.c وأن المذيع قال لنهي: «حالات التحرش دي مابتحصلش حتي في إسرائيل»، فردت عليه الفتاة: «إسرائيل دي دولة محترمة»،وأنها - أي نجلاء - بحثت عن معلومات وأوراق خاصة بالفتاة، وعرفت أنها ولدت في يافا، وأضافت أنها منذ ذلك الوقت قررت استئناف الحكم لصالح المتهم والدفاع عنه .

تعليق صغير

كنت في شرم الشيخ .. ونزلنا في أحد الفنادق وكان فيه مجموعة فلسطنيين من عرب 48 ..وكانوا بيقولوا عليهم إسرائليين .. إسرائليين إزاي ؟
سيدة فلسطينية وترتدي الزي الفلسطيني العربي ولما سألتها أنت منين .. قالت لي أنا من إسرائيل وبردة بنتها الصغيرة انا اسرائليية وباقي المجموعة إلي معاهم ، حتى جواز سفرهم عليه علامة إسرائيل والباقي هكذا .. والمياه المعدنية والحلوى والسجائر مكتوب عليها باللغة العبرية .. وعايشين حياتهم طبيعي مشفتش على وجوههم أي أسى زي إلي بنشوفه في غزة والضفة وغيرها من المناطق المحتلة .. حتى أنا اندهشت من الوضع ..
وماأعتقدش إن أهل غزة والمناطق المحتلة حيتبرأو منهم أو ينبذوهم لمجرد أن ظروفهم هي إلي خلتهم يحملون الجنسية الإسرائلية ..ويمكن لماحللت الوضع بيني وبين نفسي لقيت إن ديه الضريبة إلي بيدفعها العرب وبيدفع ثمنها أهل فلسطين كل يوم من أرواحهم الطاهرة لإحتلال أرض فلسطين ..


من أداب وميثاق مهنة المحاماة
ومش معنى إن نهى أتولدت في يافا تبقى إسرائلية.. زيها زي عرب 48 الفلسطنيين الأًصل ، ظروفها أو ظروف عمل والدها هي إلي خلتها اتولدت هناك .. أيا إن كانت الظروف لكنها مواطنة مصرية ، ليها حقوق زيها زي أي بنت ، المفروض المحامي يكون إنسان مثقف وناضج فكريا ويكون على دراية تامة بحقوق موكله عليه .

ومن أداب المهنة .. الحفاظ على أسرار الموكل الشخصية ولا يجوز النشر فيها إلا إذاكانت مخلة بأمن وإستقرار الدولة ( يعني مثلا لو الموكل .. جاسوس ، إرهابي ، أويحمل وباء قابل للإنتشار ، أو يحمل أفكار تدعو لمخالفة النظام العام والآداب) ماينفعش تكون الفضيحة على الملأ إلا إذاكانت هناك معلومات وبيانات دقيقة يحاسب عليها أمام الله وأمام ضميره .


يافرحة ماتمت بالحكم

لأن طبعا شريف جبريل حيبقى شجيع السيما ومش بعيد يتعمل له تمثال في المكان إلي اتمسك فيه ولا قدام بيته ويبقى قدوة لأمثاله من المتحرشين بأعراض البنات .

وللحديث بقية
المصدر: المصري اليوم

الأربعاء، 29 أكتوبر، 2008

إنت عا يزة تفتحي عينيها ؟



في يوم من يومياتي داخل قسم الشرطة وبالتحديد في أودة النوبتجي قعدت أستنى دوري من زحمة المحاضر ، وكانت واقفة جانبي واحدة ست ومعاها أولادها بيبكوا ._ وبتبكي بحرقة وهدومها مقطعة وحالتها صعبة وفيه جروح على جسمها ووجهها .. قلت لها أهدي بس وإن شاء الله ربنا حيحلها .


هـــــــو إيــــــه الـــــمـــوضــوع !!

_ بدأت تحكي : جارها إلي ساكن في الدور الأول بعد ماطلق مراته من أكتر من سنة بيتحرش بيها ولما ماطاوعتهوش ووافقته طلع عليها سمعةفي المنطقة إنها إنسانة مش كويسة ، والناس في المنطقة بتبصق عليها وبتسبها ومين أقرب الناس ليها .. مرات أخو جوزها إلي ساكنة معاها في نفس المنطقة وبيسبوا عيالها والولد عمره 12 سنه بقى بيتحاشى يلعب في الشارع أو يخرج من الي بيسمعه .. شكلي بقى إيه قدام عيالي .

جــــــــــــــــــوزك فــــيــــــــن ؟

_ جوزي إنسان على قد حاله بيشقى طول النهار علشان الأولاد لو مأشتغلش يوم مش حنلاقي نأكل .. بييجي أخر الليل ويخرج من البيت وش الصبح .. وأنا إلي منعته من الخناق معاه لواتخانق معاه ممكن يموتوا ونترمي إحنا في الشارع .


ماإشتكتيش ليه من زمان كان زمانه أتقبض عليه !!


_ بشتكي رحت النقطة وجابوه كذا مرة وهو متصاحب عل كل الي في النقطة بيخرج بعد نص ساعة أو أقل .مــــعـــقـــــول !_ كان القسم بدأ يهدأ والضابط سمع حواري معاها ...روحي المجلس القومي للمرأة .. في قسم شكاوي المرأة وهما حيتابعوا معاكي أو روحي وزارة الداخلية ماتسكتيش لازم يتحبس هناك أكيد حيساعدوكي ؟


وفجأة .. الضابط ( ملازم أول ) يا أستاذه أنت عايزة تفتحي عينيها مجلس قومي وغيره .. أفتح عينيها مش حرام إلي هي فيه ده ومافيش حد عايز يساعدها ._ أطمئني أنابعت دوريه حتقبض عليه ومش حيخرج من هنا إلا على النيابة وححولها على الكشف الطبي بس روحي خلصي محضرك .


الســــــــــؤال ؟
مش المفروض أنه كان أتقبض على الراجل ده من سنة وأخد عقابه ؟مع العلم أنه كان يوميا بحسب قولها بيعمل سهرات خاصة في شقته وبيتعاطى مخدرات .. طيب ليه الناس ماطلعتش عليه هو كمان سمعة وقالوا فلان مش كويس .. ولا الحال معكوس .. ولا لوكانت أستجابت له ماكنش حد قدر يتكلم عليها .
والكارثة وديه إضافة على الموضوع :
بننادي في كل مكان بحقوق المراة وبنعمل ندوات ومؤتمرات بتكلفنا ملايين الملايين وفي الأخر يقولوا إنت عايزة تفتحي عينيها والله ديه كارثة .. يعني كل ده كلام في الهوا .. ولا عشان يقولوا علينا المصريين اهما دا طبعا في الأغاني بس.

.. حاقول إيه ... ؟وللحديث بقية

حادثة التحرش وليمة ولاضرب من وراء ستارة




وليمة ولا عزومة و ضرب من وراء ستارة


إشمعنى يعني تحرش في وسط البلد ف وفي شارع جامعة الدول؟وال1000 شخص إلي تظاهروا أمام بيت السفير القطري بالمهندسين علشان يديهم 200 جنيه ؟؟
كلها أحداث غريبة ومالهاش تفسير الا من خلال الأحداث الي مرت بها مصر..


الي يقرأ في التاريخ مصر المعاصر ويفسر الرموز والعلامات الي أثرت في الأحداث من أيام حرب 73 ونصرنا إلي كان مفاجأ أذهلت العالم لازم يربط الأحداث ببعضها مرورا بحادثة تحرش شارع جامعة الدول العربية .



الصورة الأولى

..نصر أكتوبر المجيد ولا نغفل عن الدور الإستراتيجي للأشقاء العرب وقطع البترول وأيضا الدور الإستراتيجي لمصر في القضية الفلسطنية وعلى الساحة العربية عموما .



الصورة الثانية

..معاهدة السلام وزيارة الرئيس الراحل أنور السادات إلى الكنيسيت وسط ذهول العالم .. ماذا يفعل هذا الرجل ؟ما كم هذا الذكاء الذي يتحلى به هذا الرجل الذي هو من الشعب المصري ؟طبعا دول كتيرة كانت معارضة لمعاهدة السلام مع إسرائيل بما فيهم إسرائيل إلي كانت مافا قتش لسة من الهزيمة ومش عارفة إزاي ده حصل واد إيه الشعب المصري بيتحلى بالوحدة الوطنية والروح الطيبة .إلي كانت موجودة في الوقت ده .




..طيب تخيلوا أنتم حتى في المعاملات بين البشر لو واحد بلطجي واحد طيب ضرب البلطجي علقة سخنة والناس صالحتهم على بعض ياترى البلطجي حيسكت وهو مغرور بعضلاته المنفوخة على الفاضي زي مابشوف البلطجية في المحكمة إلي بيشوه الي بيعترضه أو يقتله ويهدم أسرتهلا طبعا ..
أكيد حيضمر الشر وممكن يكون لئيم وخبيث ويضرب من وراء ستارة علشان يبان طيب ومسالم وهو ده إلي حصل معانا بالضبط من بعض الكارهين والحاقدين لمصر ووصلونا للمرحلة ديه .طبعا فيه مقولة بتقول إذا احببت أن تأثر عقل أحد الأشخاص وتتملكه فتحدث معه من خلال معتقادته الدينية .




الصورة الثالثة


.. ظهور الجماعات الممولة من جهات خارجية لا يعلم مصدرها لتفكيك المجتمع المصري الذي كانت جذوره مرتبطة بالعادات والتقاليد والعلم والثقافة والفطرة الدينية السمحة ، و مجتمع مترابط ، من خلال بث أفكار دينية متطرفة و من خلال تفكيك الطبقة المتوسطة والمثقفة الي كانت أساس وبنيان المجتمع المصري إذن الهدف الأساسي محو الثقافة العلمية والفطرية للمجتمع يحكمها ستار الدين الظاهر فقط لكن من ورائها أغراض أخرى.
.. والدليل على ذلك كنت أشاهد برنامج على قناة الجزيرة وكان يخاطب الجماعة المنفذة لعملية الكلية الفنية العسكرية وقال أحدهم بالحرف .. لم نكن نعلم وقتها أن مصافحة النساء حرام !!إذن هي جماعات ليست إسلامية ولا تمت للإسلام بأي صلة ،، ولكن خاطبوا المجتمع من خلال الدين الظاهرأي الشكل مسلم فقط ولكن الفعل غير ..




الصورة الرابعة

..إستشهاد الرئيس أنور السادات رحمه الله وكان الغرض زعزعة الإستقرار بمصر وفشلهم فيه ولكنهم كانوا مخططين لزعزعة إستقرار وتفكيك الأسرة المصرية ومنها الطبقة المتوسطة وبث الكراهية بين أبناء الشعب المصري حتى تتفكك الوحدة الوطنية .




الصورة الخامسة

.. العمليات الإرهابية المتتابعة في أواخر الثمانينات والتسعينات وفشلهم الذريع فيما كانوا يخططون له من عمليات قذرة يرفضها الإسلام مع دفع كثير من الأبرياء أرواحهم ثمنا لمن لا يمتون للإسلام بأي صلة .




الصورة السادسة

..ظهور هذه الجماعات على حقيقتها فمنهم أمير الجماعة إلي كان طبال ومتجوز راقاصة .. وهروب القاصرات وتبادل الزوجات بدون زواج رسمي معترف به من الدوله والضرب القتل العشوائي للأبرياء وطبعا الفئات ديه من الجهلاء سهل جدا يسيطر عليها من خلال الأموال بيأخدوها كدعم لهذه المخططات وأيضا السيطرة على المثقفين في مصر من خلال بث الأفكار المتطرفة .




الصورة السابعة

..نجاح هذه الجماعات في بث التدين الظاهر فقط والدليل على ذلك ماوصلنا له الآن من تدهور حال نسبة كبيرة من المجتمع المصري الأخلاقي وتفككه وشغله الشاغل بالبحث واللهث وراء المال من أي مصدر سواء بالرشوة أو غيرها ..




وسبحان الله الواحد بيتخدع في الشكل والله أنا شفت مهازل من ناس كنت بخاف أكلمها من كتر التدين إلي ظاهر على وجوهم ولبسهم لكن المعاملة شئ تاني ..
الصورة الثامنة
إزاي البلطجي يخلي إلي الشخص ضربه يتحجم في مكانه وأهله يبعدوا عنه ويفقدوا الأمل فيه بعد مانجح في تدمير نفسية الشخص الي تجرأ وضربه وخلاه في صراع داخلي مع نفسه وفككه من الداخل .
المقصود بالشخص هي مصر وأهله هما الدول العربية
الصورة التاسعة شارع جامعة الدول العربية مقصد لكثير من الأشقاء العرب على مدار العام وأكييد بيأخدوا راحتهم وهما حاسين بالأمان وكتير جدا منهم عندهم شقق وبيأجروا في هذه المنطقة وطبعا معاهم أسرهم .والتجمهر إلي حصل من 1000 شخص قدام بيت السفير القطري بالمهندسين علشان 200 جنيه هل يعقل .. بالطبع لا !!!
وبحسب تصوري للواقعة إلي حصل ده وفي الوقت ده مقصود علشان الدول العربية تفقد الثقة في مصر وفي الأمان الي بيحسوا بيه جواها وطبعا قبلها خطف السياح في جنوب مصر وحريق القاهرة بالقطاعي لأهم المعالم التاريخية العريقة وغيرها .


إضافةإلى
دراسة الوضع الأمني في المكان انه مافيش دورية شرطة قريبة أو متواجدة في الوقت ده أو قسم ، فالبتالي سهل عليهم الموضوع وطبعا هما ماعندهمش تمييز بين محجبة أو غير أهم شئ الضجة الي حتعلن على المستوى العالمي عن إن مصر بلد الأمان ده بقى حالها .

والدليل إن ال 100 شاب إختفوا من مكان الواقعة والباقي إلي كان تحت تأثير المخدرات .. وطبعا حفظوهم كلمة وليمة مع إن كلمة وليمة مش كلمة دارجة على لسان الشعب المصري والكلمة الأصليه هي كلمة
( عزومة ) .
وتعتبر كلمة وليمة كلمة ثقيلة على لسان شباب معظمهم يحملون المؤهلات المتوسطة مايعرفوش غير كلمة عزومة مثال ( فلان الفلاني كان عامل لنا عزومة ) ، أنا عندي عزومة ، في الأفراح ( عاملين بوفيه وليس وليمة ) في الريف ( عاملين ختمة أو غديوة أو غدوة أو نادرين ندر ) كلمة وليمة من النادر تسمعها على لسان الشعب المصري ..


يبقى الموضوع مش تحرش ولكنه فقدان ثقة وزعزعة إستقرار وضرب من وراء ستارة .


ودا يمكن تفسيرمن خلال قرآتي عن كيفية تطور سلوك الشعب المصري وإزاي وصل للمرحلة البشعة إلي وصلها وإنحدار سلوكة إليها ويمكن أنا بحاول أقنع نفسي بيها علشان الصدمات الي بتعرض لها كل يوم في تعاملاتي اليومية وخلتني بتوقع للأسف الأسوأ .

وللحديث بقية

صبحي على عديلة .. تشيلك فوق راسها


في يوم من أيام عملي ذهبت إلى المحكمة وبالتحديد إلى جدول المحكمة للسؤال عن ما إذا كانت المحاضر وردت للمحكمة أو لا .

المهم كنا في الشتاء وارتدي كوفية صوف وعندي دور أنفلونزا مايعلم بيه الا الله .. وسألت عن المختص قالولي مدام عديلة !!

_ السلام عليكم .. صباح الخير ياأستاذة عديلة ممكن أعرف إذا كانت المحاضر ديه وردت للمحكمة أو لا .

_ مدام عديلة : صباح الخير على الي بيلبسو كوفية ومتدلعين وراحت شدتني من الكوفية .
_ فأبتسمت وشديت منها الكوفية وسألتها مرة تانية عن المحاضر .. قالت لي دوري عندك في الدفتر وراحت بصة لي بصة غريبة مافهمتهاش ولا فهمت معناها وقامت من على المكتب وفي إيديها ورق وهي هاتك ياهزار بايخ مع الي واقفين في أودة الجدول ومع زميلها .

قلت لنفسي لاحول ولا قوة الا بالله .

_ المهم دورت في الدفتر ولقيت أرقام المحاضر بس ماعرفتش أقرأ خطها كان زي نكش الفراخ لو ساقطة أولى إبتدائي خطها حيكون أحسن من كدة ، المهم كان عندي جلسة وخفت أتأخرعنها وقلت لنفسي .. أفوت عليها بكرة أستفسر منها عن إلي كتباه .

في اليوم التالي :

_ صباح الخيريا أستاذة عديلة ممكن بس أستفسر من حضرتك عن المكتوب قدام أرقام المحاضر !!!
_ مدام عديلة : أنتي مش شوفتيها إمبارح
_ معلش معرفتش أقرأ الي مكتوب قدامها
_ مدام عديلة : مافيش إستفسار ولا دفتر

_ حضرتك بتكلميني

_ مدام عديلة : بأسلوب غير مهذب أيوه كنتي هنا إمبارح عاوزة ايه تاني قلت لك مافيش دفتر
_ وقامت من مكانها بنفس أسلوب الهزار السخيف وأنا مذهوله .

_ صعبت عليا نفسي من أسلوبها الغير محترم وقلت لــ زميلها ايه البني ادمة ديه ازاي تهيني أمال الدوله معيناها ليه مش علشان مصالح الناس ، أنا طالعة لرئيس المحكمة أشوف ازاي تقول لي وتعمل معايا كدة وأقوله على هزارها السخيف وأسلوبها المنحط وإلي شوفته .
_ زميلها قام يجري من على مكتبة أسف يا أستاذة حقك عليا أنا معلش هي أسلوبها كدة ، أهدي أنت عاوزة تشوفي إيه هاتي الأرقام إلي معاكي .

_ كان واقف إثنين زملاء محاميين قالولي يا أستاذه صبحي عليها ( والله صبحت ) وإديها أي حاجة حتغير معاملتها معاكي وتشيلك فوق راسها من فوق ، ما أنتي شايفة لسه دافعين لها ودافعين لزميلها ، قلت لهم بس أنا ماصورتش أي أوراق ، من غير ماتصوري هي معاملتها كدة .

_ معاملتها تأخذ إلي في جيوب الناس ، أكلها من السحط هي وغيرها وغيرها ، إن شاء الله في بطونهم نار .
_ بصراحة صعبت عليا نفسي قوي ، إن الواحد بيتعامل جوة المحكمة وكأنه بيتسول شغله من موظفين معيناهم الدولة لخدمة مصالح المواطن والمحامي ، أنا لوكنت قاضي كنت حاحكم بأقصى عقوبه على المرتشي وإلي بيمد إيده في جيوب الناس ، علشان لا يعرف يرتشي ولا يعرف يأكل بأيده ، الفلوس الي الناس بتخرجها من قوت يومها وقوت أولادها وهما في أشد الحh[m إليها .

وللحديث بقية

شعب مش طايق بعضه


كنت بتابع برنامج 90 دقيقة على قناة المحور وكان فيه قضية شاب مسيحي قتل زوج أخته المسلم وأصاب أخته وطفلتها أصابات خطيرة بعد أن تزوجت بدون رضاء عائلتها ..
الموضوع لا مسلم ولامسيحيي .. الموضوع ممتد لعدم حب الشعب المصري لبعضه لمجرد إنهم من محافظة مختلفة عن محافظة مثلا .


_ اهل الأسكندرية بيقولوا على أهل القاهرة ( ميه نيلي ووشوش خنازيري )


_ اهل القاهرة بيقولوا على أهل الأسكندرية ( ميه مالحة ووشوش كالحة )
_ الكل بيقول على المنوفية ( المنوفي لايلوفي لو أكلته لحم الكتوفي )

_ طنطا بلد الأونطة

_ ياستر من المحلة يارب ألطف

_محافظات الصعيد الصعايدة وصلوا ( ياصعيدي عمتك دابت من الفول النابت )

_أسوان والنوبة ( سرقوا الصندوق يامحمد لكن مفتاحه معايا )

_ بس أهل الشرقية هما إلي خرجوا من الموضوع علشان أكلوا القطر .
( وهلما جر )
طيب ليه ياجماعة بتعملوا كدة في بعض دا انتوا شعب واحد .. يبقى الموضوع مش مسلم ومسيحي الموضوع إن مافيش حد بيحب التاني بغض النظر عن الدين إحنا شعب متعصب لبعضه .


_ من شهر تقريبا كان فيه نفس قضية قتل الشاب المسيحي للشاب المسلم وهي .. شاب مسلم من محافظة القاهرة وتقدم لبنت مسلمة من محافظة في الصعيد ، أهلها رفضوا لأنه من محافظة القاهرة .. بقى ده يرضي ربنا رفضوه لمجرد أنه من القاهرة .




_ هما أهل محافظة القاهرة جايين من كوكب المريخ مثلا ، محافظة القاهرة عبارة عن خليط بشري من شرق مصر لغربها ومن شمالها لجنوبها .


المهم الشاب والبنت هربوا وتزوجوا في مصر ، أهل البنت دوروا عليها في مصر وجم وأخدوها معاهم الصعيدراح الشاب يدور عليها في محافظتها ووجدها في النهاية جثة هامدة في المستشفى .


_ طبعا أنا ضد أن البنت تغضب ربنا و تتزوج بدون رضا أهلها وتخرج عن طوعهم وعادتهم وتقاليدهم ، والبنت إلي تعمل كدة تستاهل قطم رقابتها .


_ وفي المحكمة تلاقي في قضية الطلاق تلاقي بتقول الزوجة أنا غلطانة إني تزوجت من محافظة كذا والزوج كذلك يقول أنا أمي حذرتني وقالت لي بلاش تأخذ من محافظة كذا .. ماأحنا عندنا بناتنا زي مايكونوا مش من بلد واحدة ومن بلد عدوة .. مش طبيعي ومش منطقي ان نفوسنا وتفكيرنا يوصلوا للمرحلة ديه ومانبقاش طايقين بعض .



_ إذن الموضوع مش مسلم ومسيحي الموضوع إن الشعب مش طايق بعضة .



وللحديث بقية

حاولع فيك لو مسكتيش

في العيد نزلت الشارع علشان اجيب متطلبات البيت من المنطقة إلي بسكن فيها ، المهم وانا ماشية ولد في سن ال16 ، 17 سنة عاكسني بكلمات خادشة فزعقت فيه وقلت له ، ماتحترم نفسك انت مش محترم ...والمفاجأة ...

والمفاجأة
...فوجئت بالولد في ايده زجاجة جاز أو بنزين وولاعة وقال لي حاولع فيكي ؟؟؟؟في منتهى قلة الأدب والإنحطاط الأخلاقي إلي بنشوفها في الشارع المصري ..

ولما زعقت فيه وقلت له حاعمل لك محضر ضحك ها ها ها وفضل يتنطط زي الأراجوز ؟؟ انت تعمل لي محضر يابت ها ها ها ، للأسف انا مالقيتش دورية شرطة واحدة في الشارع تردعه هو وأمثاله .

وللأسف
...المعادي والمعادي الجديدة تحيط بها مناطق عشوائية زي مناطق من فايدة كامل وعزب العرب ومناطق من البساتين وترب اليهود ونسبة كبيرة من سكان هذه المناطق من البلطجية والصيعومدمنوا المخدرات ومعتادي الإجرام ..حسبنا الله ونعم الوكيل عندي حالة ذهول لأنه ممكن كان ولع فيا وجري علشان بعترض على المعاكسة .

وللحديث بقية ....

الثلاثاء، 28 أكتوبر، 2008

رغيف العيش بيشم الهوا على الرصيف



طبعا كلنا إتأثرنا وتابعنا أزمة العيش الطاحنة في مصر وشفنا شهداء طوابير العيش ( إلي اندهس تحت الرجلين والي ولعوا فيها) وعيشنا الحمد لله وشفنا عيش القوات المسلحة الي زي الفل وطبعا منقدرش نبعد كتير عن الكلام عن العيش السياحي إلي كان بيتباع بــ 25 قرش وفجأة في يوم واحد بس بقى سعره بــ50 قرش للرغيف ...



حتى أهل الريف والصعيد إلي كانوا بيخبزوا عيش لا يعلى عليه ومتنوع زي عيش الشعير وعيش البتاو وعيش الذرة والعيش المرحرح والعيش الشمسي .. كان عندهم أزمة يظهر إن الستات مش فاضيين يخبزوا ، ولا ازواجهم فاضيين يزرعوا .. أنضموا هما كمان لطوابير العيش ...



المشكلة سواء إتحلت أو ما اتحلتش هو ده المشهد المعتاد في طابور العيش الطويل العريض بعد مايشتري شعبنا الجميل بثقافته الغذائية والصحية المعدومة رغيف العيش .. إلي في أحيان كتيرة الرغيف بيكون وجبة رئيسية للفرد .. بيوزع أرغفة العيش بشكل منسق ومهندم ويرصها على الأرض أو على الرصيف علشان يتهوى ..



يعني بيرميه على الأرض الي بتمشي عليها العربيات وأحذية الناس والحيوانات ومليانة زبالة ومجاري وبعد كدة ياكلوا بالهنا والعافية مش كفاية السوس والحشرات إلي بيلاقوها في الرغيف ..



ومش بس العيش الحكومي .. والعيش السياحي كمان .. تلاقي الي بيوزع العيش شايل الطاولة على رأسه وماسك العجلة وبيسوق بإيد وساند الطاولة إلي على راسه بإييد وياسلام لما الطاولة بتتزحلق وتقع من على راسه وينزل يلم العيش من على الأرض ويكمل المسيرة وسط مداخن عوادم العربيات ..ويوزعه على البياع إلي قاعد على الرصيف جنب مقلب قمامة وخط مجاري بيجري من تحت الرصيف وشعبنا يأكل .. ومطرح مايسري يمري ياشعب مصر بالصحة والعافية ..


وللحديث بقية ....

لحياة سعيدة وصحية.. اقترح عليك !!



..انزل الشارع في أي مكان يعجبك ، شم بنزين محروق خلي صحتك تتدمربالرصاص وأكسيد الكربون , أقف أنت بس في الشارع وقول نفسي اشم هوا.


.. إقتراح أجمل .. أقف عند مقالب الزبالة المعفنة المنتشرة في كل مكان وشم الهواء المحمل بأنواع الفيروسات والبكتريا وإنت عارف الباقي .


_ اقولك اسكن في مكان محترم , وإن شاء الله حيتحول الى مكان تبني حوله العشوائيات ويفتح فيه ورش دوكو وتصليح سيارات , يعني قد 50 ورشة وعشرين قهوة في شارع تلم الصيع والمدمنين والحي بتاع المنطقة حيبقى حارس لأنه مش مرخصهم ولكنه ديكور يزين الشوارع في المناطق الراقية وأكل عيش للحي ، إلي أصبحت مداس لسكان العشوائيات , وأسمع الخبط والدق وصوت الصنايعية وهما بيتخانقوا ، وأبقى خلي مراتك ولا بنتك تنزل الشارع ، ولوصايع عاكسها أوعى تتكلم .. عارف ليه لأنك حتصرف إلي في جيبك في المحاضر والشاي والإكرامية.. وكله بتمنه وحيبقى جيرانك ( علوكة ، وكخة ، وموس ) وأنت ساكن في مكان محترم.


.. اشرب ميه من أي مكان يقابلك ولا يهمك سوداء ولا فيها بلاوي .


.. طيب روح عيادة دكتور أسنان وماتخفش العيادات مابتعقمش الأدوات إما حتخرج بالإيدز أو فيرس سي متقلقش خالص .


أقترح عليك ....

وللحديث بقية