الجمعة، 26 فبراير 2010

ابحث عن زوجة من الحمام







احدث طريقة للجواز البحث عن زوجة بقت من الحمام وطبعا الزوجة ديه حتكون شبه الحمام العام وليها ريحتها الخاصة مالهاش مثيل في اخلاقها !!! وطبعا نتيجة تقدير الراجل المصري و احترامه للمرأة وتشبيها بمحتويات الحمام الي المفروض الانسان المسلم الي في قلبه ذرة اسلام مش ايمان يستعيذ من الخبث والخبائث عند دخوله ..

كان عندي شغل في احدى المحاكم في محافظات مصر الي ليها عادتها وتقاليدها وعراقتها وهناك مجمع المحاكم المبني على احدث طراز وانا في الطريق راكبة سمعت كام كلمة كدة عن بنات القاهرة بالذات وان بنات القاهرة مالهمش كبير يلمهم وكانت الكارثة الاخ الكريم الي كان بينصح واحد قاعد جنبه انه مايتجوزش ابدا لا من القاهرة ويليها الاسكندرية ونصحة ان بنات الريف مافيش احسن منهم وهنا انفجر بركان من التحذيرات للاخ !!!!


مالهم بنات القاهرة ؟

الاخ تحذير : منفتحين ومالهمش كبير على الاقل البنت عندنا اقصى حاجة عندها بتقابل ابن الجيران والبلد كلها بتعرف
ابن الجيران وماحدش بيقولها كدة عيب بتتكلموا عليها بس
الاخ تحذير : يااخت انتو بتخرجوا للساعة اتنين وتلاتة الفجر
ياه ه ه وياترى بنروح فين ؟
شوف يااخ كل مكان على وجهه الكرة الارضية فيه الكويس وفيه الوحش والسلوك مش مرتبط بالمكان لكنه مرتبط بوسوسة النفس واستعداد الانسان لارتكاب السلوك الخاطئ
طيب ماانت عندك الاسبوع الي فات البنت الي من كفر الدوار الي قعدت عند ولد 10 ايام ولما رجعت حلقت شعرها وعملت مسلسل على اهلها والبنت الي عندها 15 سنة وكانت بتقابل الشباب في الزراعات وبتاخذ منهم فلوس وحملت سفاح يعني ماكنوش من القاهرة ولا من اسكندرية
تحب اقولك عن الحوادث البشعة التانية الي بتحصل خارج محافظة القاهرة ولابلاش.
وبعدين غالبية سكان القاهرة ليهم جذور في الريف المصري وفي الصعيد ولا جايين من كوكب المريخ ..

راكب آخر : انت جايه من القاهرة علشان شغل كل المسافة ديه وحتروحي امتى ؟
والله يااخ الساعة دلوقتي حسب التوقيت المحلي 8 صباحا مش 3 فجرا وانا زيي زي الولد بشوف شغلي واعتقد اني مافرقش عنه شئ نهائي
الاخ تحذير : شوفي كل الافلام الي بتتعرض بتخلي الدول العربية تقول علينا ايه وعلى ستات مصر ايه ؟
طيب ماالافلام الاجنبية مالهاش علاقة بالمجتمع الغربي نهائي وبيصدروها لنا علشان تفسدنا ولوكانت صحيحة ماكنوش فاقونا علما وتحضر
المهم انهيت الحوار بأسرع مايمكن ووضعت على أذني السماعات وانا بستمع لصوت فيروز الآخاذ ونظري متابع اللون الاخضر على الطريق وحاولت اني اركز في اللون الاخضر قدر الامكان قبل ماارجع القاهرة للضوضاء والزحمة .

الى المحكمة

بصراحة كان يوم شاق وتناسيت الحوار نهائي وكان كل تفكيري في شغلي وبعد ماانتهيت سألت على حمام السيدات ووقفت قدام المرايا وفجأة شدت انتباهي كتابة معكوسة من على باب الحمام الي خلفي فشدت انتباهي اني اقراها ولقيت مكتوب عليه ..
ابحث عن زوجة من الحمام دا ايه الرومانسية الحمامية ديه ومن اي مكان واي زمان لا والله الراجل نفسه حلوة ان شا الله تكون شبه امنا الغولة ماهي من الحمام وكاتب مقطع من اغنية قال يعني شاعر ورومانسي وعامل جو شاعري فكاتب مقطع من اغنية حبيبتي انا وانت مش اقوى من الزمن !!!

زوجة من الحمام

المرأة الرخيصة في نظر الرجل رخيصة في نظر نفسها .. للدرجة ديه وصل التفكيربأن المرأة رخيصة للحد ده فيه ايه ؟ جد واستجد على مجتمعنا ليه الرجل بيهين المرأة ويحسسها انها رخيصة للدرجة دي .. وياترى حتكون شكلها ايه الزوجة الي من الحمام والي من اي زمان واي مكان زي مالحبييب الي مغرم بالحمام كاتب انه عايزها من اي زمان واي مكان يعني مايهمهوش شكلها ممكن تكون صبية او كركوبة لكنها اكيد بتنتمي للحمام فمابالكم حيكون شكلها ايه .. وريحتها اكيد حتكون زي شكلها وسلوكها حيكون سابقهم .. وطبعا حتكون على شاكلة الحبيب الي من الحمام المغرم الي كاتب شرطه الوحيد انها تكون من الحمام وآخر نكتة طبعا انه لما يحب يطلقها دا لو كان عايز يتجوزها وماكنش غرضه شئ تاني وده المؤكد طبعا .. بدل مايقولها روحي وانت طالق ح....؟؟؟


عن أبي هريرة رضي الله عنه عن النبي صلى الله عليه وسلم قال: تنكح المرأة لأربع: لمالها ولحسبها ولجمالها ولدينها، فاظفر بذات الدين تربت يداك.

تقاليد ايه واخلاق ايه وبنات قاهرة واسكندرية ايه بقى لما المرأة بقت سلعة رخيصة في مجتمع فاسد ونفوس فاسدة في كل مكان حاقول ايه غير ..


وللحديث بقية


هناك 6 تعليقات:

جمعية الباحثين والتدريسيين الجامعيين - العراق يقول...

شكرا على المدونة

ناصرمحروس سيد يقول...

المراة كل الحياه

hamma يقول...

الجهل مصيبة

حياة يقول...

جمعية الباحثين والتدريسيين الجامعيين - العراق
الف شكر على المرور الطيب بمدونتي
قلوبنا مع اهلنا بالعراق اللهم يسر لهم الأمن والآمان والخير
اسعدني تواجدك الكريم
تحياتي وتقديري

حياة يقول...

الشيخ ناصر محروس
الف شكر على المرور الطيب بمدونتي
بالفعل المرأة كل الحياة ولكن يكفيها النصف فقط والنصف الآخر للرجل
اسعدني تواجدك الكريم
تحياتي وتقديري

حياة يقول...

hamma
الف شكر على المرور الطيب بمدونتي
بالفعل الجهل مصيبة لايدرك عواقبها الابعد وقوعها ويدرك مدى جهله الذي اوقعه بها
اسعدني تواجدك الكريم
تحياتي وتقديري