الخميس، 5 مارس 2009

سممونا وفيرسونا وسرطنونا كمان وكمان

بعد ماقرأنا عن كارثة صناعة الأكواب والمعالق والعلب البلاستيك في مصانع بئر السلم من تدوير مخلفات المستشفيات وهي عبارة عن .. اكياس الدم الفارغة بعد الإستعمال , سرنجات الحقن بعد الحقن وحدات غسيل الكلى وفلاتر ترشيح الدم المستعملة, وقفازات العمليات الجراحية ..!! بالتأكيد مافيش حد فينا استغرب لأننا في عصر أشباه البشر .


تحيا الصين

في الصين وفي واقعة لبن الأطفال الملوث تم اعدام اثنيين من المسئولين لكن الي متأكدة إن الحكم في فضيحة تدوير المخلفات عندنا حيساوي الحكم بــ قتل معزة أو حمار بالخطأ يعني في الآخر حبس ... الي لو حدثت في اي دولة من دول العالم العاشر..... لكان تم اعدام أصبح متعهدو جمع القمامة من المستشفيات والمسئولين عن خروج المخلفات من المستشفى وصاحب مصنع البلاستيك المخالف في ميدان عام ( عقوبة المفسدين في الأرض ) ومنع بناء بئر سلم في الدولة كلها لأي مبنى ..


حتى لعب الأطفال الأبرياء

والكارثة الأكبر أن القطن المستعمل في الجراحات والملئ بالدماء الملوثة وبقايا الجروح بيتم حشو دمى ولعب الأطفال بيه .. بعد وضع مادة تمتص اللون الأحمر او الألوان بس من غير حتى تعقيم وبعد كدة .. يلعب الطفل بكل الأمراض الي موجودة بداية من السرطانات نهاية بالفيروسات .. !!! ادي الضمير ولا بلاش


شاليموه مصاصة لونه اسود وبالونات الدم الملوث

كنت راكبة المترو وقاعدة جنبي طفلة مع مامتها وفي ايدها مصاصة وبصت لي وضحكت ومدت ايديها ليا بالمصاصة ... الي لفت نظري ان لون الشاليموه اسود زي اكياس القمامة ... قتناقشت مع مامتها في الموضوع
واكدت لها ان البلاستيك ده مش نقي وانهم حتى ماقدروش يحولوا لونه من تلوثه

قالت لي ... والله تعباني كل يوم والتاني عند الدكتورة مابين انيميا الى نزلة معوية وجنبها بيوجعها والدكتورة محرجة عليا انها متأكلش اي حاجة في الشارع بس حاعمل لها ايه اطفلة ؟؟؟ وفعلا البنت لونها شاحب ووجها فيه بقع بيضاء


.. يبقى العيب في الرقابة الصحية الي مش معترفة بصحتنا الآدمية والي المفروض توفر للطفل والمواطن ابسط درجات الحماية ومش بس الشاليموه .. لأ ده كمان بيتم تصنيع بالونات الأطفال من نفايات المستشفيات كمان .. يبقى منستغربش من تزايد اعداد اصابة الأطفال كتيرة لدرجة انشاء مستشفى لسرطان الأطفال .. فالسبب معروف

هو احنا فين!!
في بلد فيها ناس .. بشر ولا أنا غلطانة ..


التطور الطبيعي للشعب المصري

ولا زي مابيقولوا ان شعبنا معدته بتهضم الزلط والحديد مانكنش حنتطور وحنتقلب نعامة ونندبح في الآخر آكثر ماحنا مدبحوين ..بس ياخسارة مش حننفع حد يآكلنا !!!!! لأن لحمنا حيبقى ملوث ومسمم وميصلحش


من شهر فات

كل اعتقادي ان الشراب في اكواب بلاستيك اي شئ ساخن بيسبب سرطان المعدة أو سرطان في الدم .. لتفاعل المادة الكيميائية مع الحرارة ... لكن بعدها أكتشفت ان فيه أشباه بشر عايشة على دم ولحم الغلابة والبسطاء وبتغتال براءة وصحة الطفولة ... علشان عارفين أن العقاب حيكون بسيط ... أي مفتش في الصحة عارفين طريقه التعامل معاه والفلوس بتعمي النفوس وبتخلي البشر أشباه بشر عبيد للمال ....


سرطان وفيرس C , A وإيدز و نزلات معوية وقرح بالمعدة
وكل الي عاوزه حتلاقيه .... بس المشكلة انه اجباري وأنت وحظك

من أول علبة ومعلقة الكشري , الزبادي والأرز بلبن , لغاية شاليموه الأطفال , واكواب الشاي البلاستيك دا طبعا بخلاف الغذاء الملوث والمرشوش يعني الي بيأكل من السوق مش بيحقق الرقم القياسي بس في السكر والقرح والسمنة لا دا بيأخد معاهم هدية السرطان والفيروسات... كمان الي بيأكل من البيت في غير مأمن من تناوله اغذية فاسدة ومرشوشة مبيدات مسرطنة ويبقى كدة حققنا كل الأرقام القياسية العالمية في الأمراض ومحرمناش نفسنا من حاجة هو فيه حد زينا....!!


الشكوى لغير الله مذلة

رحت اقدم شكوى لوزارة الصحة في شخص بيصنع غذاء فاسد وملوث في دورة مياة العمارة والي استولى عليها بالغصب .. وبما انه صاحب مفتش الصحة ( الروح بالروح حرامي ومرتشي ماتفرقش ) قالي لو مش عاجبك عزلي احسن ... رحت وزارة البيئة قالولي بالحرف الواحد في مكتب شكاوى المواطنيين أحنا منك نعزل احسن حتتعبي نفسك على الفاضي لوقدمتي 100 شكوى ورفعتي مليون قضية...ياسلام ونعم التعاون هي ديه الروح الرياضية والإقتراحات المثمرة الي بتحافظ على صحة المواطن ..



حسابكم عند الله عسير

كل متخاذل في تأديه وظيفته من اصغر لأكبر مسئول حيتحاسب بعدد كل نفس مرضت وماتت بسبب الغش وفساد النفوس .. الدنيا ما بتدومش لأحد احنا مش مخلدين فيها ومافيش حد بيموت وسلطته بتشفع له ولا بيدفع رشوة علشان مايتحاسبش في الأخرة ويعدى من جهنم وبئس المصير .. لوكان عنده قناطير مقنطرة من الأموال.. مابتشتريش الحياة ولا الصحة ولا الإعفاء من العقاب في الآخرة .. بس مين الي يعرف الناس في غفلة ...


حأقول ايه ..غير؟

ألف سلامة عليك ياصحتنا بقالنا كتير ماشفنكيش

هناك 9 تعليقات:

Reza Winandar يقول...

Can you review my blog? Or even subscribe my blog feed at feeds2.feedburner.com/anotherwaytoearnmoney>

زوجة عنيدة يقول...

اية دة كلة انا كدة لا هاكل ولا هشرب ولا همشى حتى فى الشارع

اقولك حاجة خليها على ربنا

وحسبنا الله ونعم الوكيل

معنديش كلمة احسن من كدة

سلام

Nabil يقول...

السلام عليكم.......

اخباركم ايه؟؟ يارب تكونى فى احسن حال

طبعا موضوع رائع كالعاده يارب البلد كلها تبقى فى اجتهادكم

الموضوع ده بقى بجد بقى عامل لينا قلق هستيرى

الثقه بقت منعدمه فى اى حاجه كل حاجه بناكلها واحنا خايفين حاجه بجد متعبه جدا

المشكله طب وايه الحل هنقاطع ايه ولا ايه

من كتر القلق وقلة البدايل ساعات بنوصل للياس ونقول "ربنا يستر وخلاص
هانعمل ايه يعنى"

طبعا ده غلط جدا بس الوضع الصحى زى كل الاوضاع بقى فى الحضيض

وبمناسبه الالبان ده من فتره حصل فى لبن الاطفال المدعم قصص تتحكى فى الافلام

والبلح الملون اللى عرفناه من حضرتك

والله ا حاجه مرعبه ومتعبه

فعلا ربنا يعيننا على حالنا وعلى حياتنا

بس لازم يكون فى حل

تحياتى واحترامى وتقديرى لمجهود حضرتك
وايجابيتك فى التعامل مع المواقف اللى بتقابليها

يارب المجتمع كله يبقى ايجابى كده

ارق تحياتى وسلامى

حياة يقول...

Reza Winandar

Hello,
thanks for your comment,
..I'll do it
with my best wishes

حياة يقول...

زوجة عنيدة

بارك الله فيك
مرحبا بك في مدونتي المتواضعة
اسعدني رأيك الصائب

عندك حق خليها على ربنا الواحد كدة مش هيأكل ويشرب ولا حتى يمكن يمشي في الشارع .. تعرفي أنا قعدت سنة في البيت ماخرجتش منه إلا مرات معدودة بسبب الي كنت بقرأه.. حسبنا الله ونعم الوكيل أحسن كلمةفعلا ..
ونعم بالله

ألف شكر على مرورك العطر نورتيني
أطيب تحية

حياة يقول...

وعليكم السلام ورحمة الله وبركاته

نبيل
ربنا يخليك و, الحمد لله بخير
وأنت إيه أخبارك وأخبار النتيجة إن شاء الله من المتفوقين

دائما يسعدني ارأيك الصائب

عندك حق ربنا يعيننا على حالنا الثقه بقت منعدمه فى اى حاجه كل حاجه بناكلها واحنا خايفين..الوضع الصحى زى كل الاوضاع بقى فى الحضيض ..

بس تعرف حاجة ان نسبة كبيرة من شعبنا حتى الي حاصلين على أعلى الدرجات العلمية ماعندهومش وعي صحي بالمفيد والي بيضرهم وللأسف .. أصحاب النفوس الضعيفة بيستغلوا الجهل
يعني مثلا لما بروح اشتري اي حاجة لازم اشوف تاريخ الصلاحية مع ان تاريخ الصلاحية كمان بيتم تغييره ومسحه واعادة تأريخة ..دا بخلاف الطعام المصنع في 90% من المطاعم إزاي نضمن أنه مش سليم مع انتشار الأمراض بشكل ملفت .. حتى لبن الأطفال زي ماذكرت مارحموش ضعفهم وبرائتهم .. وصناعة اللانشون والسجق من فوارغ الفراخ .. طبعا بخلاف
الخضار والفاكهة المغشوشة والمرشوشة..

الحل هو اننا لازم نخلي بالنا على صحتنا ونرفض اي شئ خطير .. ويكون فيه ايجابية لأن مجتمعنا عايش في سلبية واصحاب النفوس الضعيفة بيستغلوها اهم حاجة عندهم المال .. ربنا يستر
يارب المجتمع كله يبقى ايجابى

اتمنى اني اكون على قدر كرم الكلمات الطيبة .. وتبشرني بالنتيجة

ألف شكر على مرورك الكريم
أطيب تحية

nody_1987 يقول...

دا الى يفقع مرارتك
كانت منى اشاذلى جايبه مخزن للمخلفات بتاعه المستشفيات الى بيدوروها
ومعظمها من القصر العينى
والمسؤل يقاوح ويقول لا نسبه ضئيه جدا
والكاميرا بتعرض ان تقريبا كلها مكتوب عليها القصر العينى
بيستعمونا كمان

لا فى دم ولا ضمير ولا دين
ربنا يجرب على كل فاسد العذاب الى الغلابه بيتعذبوه

حياة يقول...

نودي
بارك الله فيك
ايه اخبارك
اسعدني رأيك الصائب

أنا شفت الحلقة وكنت في حالة ضيق من مشاهدة المخازن والناس الي عايشة حواليها وبيتعاملوا مع المخلفات كأنه شئ عادي ..تعرفي ان غالبية الي بينقلوا المخلفات الملوثة مصابين بفيروسات وسرطانات ..وعن واقعة شفتها بنفسي للأسف الناس بقوا عايشين في غفلة
ويمكن حالتهم ديه تفسر بالسنيين الخادعة الي بتسبق ظهور المسيخ الدجال ..

وعندك حق همافعلا بيستعمونا وعايزين يظهروا الموضوع على انه أمر عارض ومش مؤثر .. مع ان العكس صحيح .. والدليل قدامهم في القصر العيني ومستشفى سرطان الأطفال نسبة امراض مرتفعة وغالبتهم من البسطاء الي بيباع لهم السم في العسل وفي تزايد بسبب فساد النفوس والذمم .. عقابهم في الدنيا وفي الآخرة اليم بس لو يعرفوا .. الله يعفينا ويرحمنا ..

ألف شكر على مرورك العطر نورتيني
أطيب تحية

تفحيط قراند يقول...

سال حبرك هنا وروانا بقطرا كاد الدمع
يستل منا امام تلك الكلمات العظيمه
فكم فخورين بك


تفحيط قراند
http://www.alnaddy.com/youtube/143105_%D8%AA%D9%81%D8%AD%D9%8A%D8%B7_%D9%82%D8%B1%D8%A7%D9%86%D8%AF_%D9%83%D8%A7%D9%85%D8%B1%D9%8A_%D8%AA%D9%81%D8%AD%D9%8A%D8%B7_%D8%AC%D8%B1%D8%A7%D9%86%D8%AF_%D8%A8%D9%84%D8%A7%D9%8A_%D8%B3%D8%AA%D9%8A%D8%B4%D9%86_3_%D8%AC%D8%AF%D9%8A%D8%AF%D8%A9.html