الجمعة، 2 أبريل 2010

قاضي ست بجيبة يعني


قاضي امرأة او قاضي ست

من سنوات ومن شهور اثيرت قضية تعيين المرأة في سلك القضاء المصري يعني تبقى قاضية مش قضية !!!!

الدنيا قامت ماقعدتش لما الجمعية العمومية لمجلس الدولة رفضت تعيين المرأة وبصراحة انا كنت اول معارضة لقرار والرفض لكن بعد مادرست الموضوع من كل الجوانب لقيت فيه نظرة قانونية لايشعر بها المجتمع لانه متعايش في مجتمع بعيد كل البعد عن اجواء المحاكم ..

وعرفت ان الموضوع مالهوش اي علاقة بالمساواه نهائيا .. الموضوع يتعلق بتغيير جذري في طبقات المجتمع ونظرة متدنية للمرأة ..

القضاء لا يصلح للمرأة في مصر في جميع مجالاته

محاكم مصر

تكتظ بالقضايا والغالبية العظمى منها جرائم اما ساكنين العشوائيات ومسجلين الخطر فئة أ وب وج أو فئة البزنس او من لهم سطوة وتجار المخدرات اومن نوع من اين لك هذا وكلا من الفئتين ليهم ايديهم الممدودة اما الفئة المتوسطة الغلبانة فخلافتها تنحصر مابين الايجارات والطلاق و قضايا عالم سمسم


المشهد في المحكمة
وقاضي إمرأة قاعدة على المنصة

لو اتعينت في سلك النيابة في التدرج الطبيعي قبل اعتلاء منصة القضاء واتعرض عليها المتهمين في قضايا آداب مهزلة لما تتعرض على النيابة ناس مالهمش علاقة بالبني ادمين ومسجلين خطر وقتل من اول اسبوع حتصاب بجميع الامراض الي في الدنيا وغالبا حيبقى فيه جنبها خلاط وجردل مليان ليمون علشان غممان النفس من المناظر الي حتشوفها .

وطبعا العامة ماشافوش المنظر الي اعتاد المحاميين عليه لما اهالي المتهمين دول بيفترشوا ارض المحاكم وكأنهم جايين يتفسحوا ولاقاعدين على كورنيش النيل وقاعدين معاهم منتظرين العرض على النيابة والكلبشات في ايديهم حاجة كدة اسبشيال
موس ولا شمة و لا نفخوا كلهم بلطجية وحرامية ومدمنين وقتالين قتلة وواقفين في القفص

وياسلام الي قاعدة على المنصة قاضي ست وحكمت على واحد منهم بالاعدام او بالسجن المشدد ..
عينيها ماتشوف الا النور
من المعلمة شربخ ومطوة وسنجة ولا كلاوي سواء من المتهمين او اهاليهم ساكنة فيين ال؟؟؟ ديه مش حتخرج من بيتها .... وكل الالفاظ الي في القاموس المحترم بتاعهم دا لوروحت سليمة ولا في شعرة واحدة في راسها حيقرقشوها بعد ماتنطق بالحكم
انا ساعات مابعرفش افرق بين الرجالة ولا الستات من الي بشوفه ؟

من شهر تقريبا كنت راحة محكمة شمال الي في العباسية وفيه مشهد غريب شخص واقف ورابط راسه بعمة كاروهات ولابس بادي وبنطلون وليه عضلات منفوخة ولابس جلد على معاصم ايديه وكانت المفاجأة انها طلعت واحدة ست مش راجل ياارحم الراحمين ياالله واحدة ست فتواية ؟؟
واقفة مع العصابة الي معاها مستنيين عربية الترحيلة الي فيها حد منهم عليه محاكمة في جنايات القاهرة ؟؟

من جوة القفص
بص الموزة ديه اعسليه عسلية بأسلوب اللمبي المعروف لكوا ان تتخيلوا المنظر والكلام الي ممكن يخرج والي ممكن تتعرض له القاضي اقصد القضة !!! اخد تابيدة ياعسلية وطبعا دا كلام مؤدب من الالفاظ الي بتتطرأ على مسامعنا في المحكمة .. وده بسبب النظرة المتدنية من المجتمع الذكوري للمرأة والي بيعتبر المرأة ؟؟؟

القاضي حامل
وياسلام لو القاضي حامل ولا بتتوحم اووووووووووف دول مابيستحموش ياي اولل لااه فين البيرسول او الفليت فين البرفيوم ولا لو اتوحمت على واحد اسمه بشلة ولا على واحدة اسمها شربخ ههههههههههههه ..


ولا لوواحدة من المتهمين ولا اهاليهم دول حطت القضية في دماغها لاشرطة ولاحراسة ولاغيرها حتنفع .. يابووووووووووي

المشاعر المميزة للمرأة
لوبيتها فيه مشكلة حيبقى حكمها بعاطفتها وقاعدة تفكيرها مع المشكلة بالتأكيد لان المرأة يغلب على تفكيرها العاطفة اكثر من العقل بخلاف التغيير الهرموني لدى المرأة في مراحل عمرها المختلفة والي بيأثر تأثير جذري على الحالة المزاجية عندها
وللعلم العاطفة والمشاعر احاسيس اختص بها الله سبحانه وتعالى وميزها عن الرجل بها .. وهي ميزة مش عيب لكن ميزة لما تكون في مكانها الصحيح ..

سؤال
ليه المرأة تصلح لأن تكون قاضي في امريكا والدول الأروبية ولا تصلح في مصر ؟
اولا المرأة هناك مابتتعينش بنظام القرابة للدرجة العاشرة لكنها بتتعين طبقا لمؤهلها وثقافتها لكن في مصر حتتعين بمواصفات معينة يعني كل الي كن واقفات عاملات احتجاج دول مافيش ولا واحدة فيهن حتتعين قاضي دول صوت وكناية بس لكن الي حيتعينوا كالمعتاد قاعدين في ابراج عاجية بيتابعوا !!تبقى ازاي حتتعامل على ارض الواقع ؟


زمان كان فيه نظام اداري بيحترم المرأة

على مااسمع كانت المدرسة لما بتتجوز لا يسمح لها بالعمل.. فرق شاسع بين زمان ودلوقتي
المرأة في الشارع للساعة 3 و4 العصرواحيانا لفترات الليل وبتتبهدل في المترو والمواصلات العامة وخارج بيتها ومهملة اولادها علشان مرتب لايسمن ولايغني من جوع .. فين القوامة يارجال مين الست ومين الراجل ؟


حاقول ايه غير كلمة
الى كل امرأة مكانتك ليست بالمساواه ولكن بتطبيق القوامة ..

وللحديث بقية




هناك تعليقان (2):

AM.SA.CHANNEL يقول...

في دولة الإمارات تم تعيين قاضية و لكن على القضايا التجارية فقط، و أنا ضد أن تكون المرأة قاضية، و لكن بعد أن قلتي الحمل و الوحام هههههه الله يستر ..

حياة بلا روح يقول...

AM.SA.CHANNEL
الف شكر على المرور العطر بمدونتي

المجتمع المصري للاسف اصابته شيخوخة التفكير تجاه المرأة فحتى لو كانت القاضي المرأة تبلغ من العمر 60 عاما هي بالنسبة للرجال امرأة غير مسموح لها ان تجلس على منصة القضاء.. لا لك ان تتخيلي اذا كانت القاضي صغيرة السن او حامل مثلا وتجلس على المنصة واصدرت حكم حتبقى غير متقبل منها اي حكم ههههه لازم تفكر كويس فبل ماتجني على نفسها.

اسعدني تواجدك الجميل

تحياتي وتقديري