الخميس، 30 أكتوبر 2008

شعبنا يامقلوب حاله .. كلنا نهى رشدي



حقيقي إحنا شعب بيستخبى ورا المظاهر .. لوكانت نهى رشدي المصرية ، من أي مكان على وجهه الكرة الأرضية ، كنت حأيدها واحترمها .. يكفي أنها دافعت عن نفسها بكل شجاعة وماوفقتش أنها تكون ضحية إنسان لا عنده أخلاق ولاقيم .. ولا لوكانت استسلمت كنا وقفنا نتفرج ونصفق للمتحرش وساعتها تبقى عاقلة ماهو كل شئ مقلوب حاله عندنا .

دفاع المتهم
دفاع المتهم .. اتهم نهى وصاحبتها أنهم ماشيين يتقصعوا في دفاعه ؟
وهو عارف كويس
الي ماشيين يتقصعوا دول بييجوا منين
وبنشوفهم في المحاكم في قضايا الآداب من بيئة فاسدة لا عندها دين ولا اخلاق ولا قيم ..
و بيستخبوا في الدين زي الحرامي .. والدين برئ منهم وعذابهم في الدرك الأٍسفل من النار .



_ حلو المنظر إلي في الصورة ده هو ده الإحترام وتعمل بلاوي بعد كدة مش مهم طالما محجبة ولابسة الزي الرسمي علشان ترضي الناس بس .. ونسيت إن الله سبحانه وتعالى شرع الحجاب لصيانتها ولسترها وإن رضا ربنا فوق رضا أي مخلوق .


_ والبنات الي في حادثة تحرش المهندسين هربوا زي النعامة الخايفة ودفنوا راسهم في الرمل .. يعني لو كانوا أعلنوا عن نفسهم كانوا حيبقوا مش طبعيين برده علشان بيدافعوا عن نفسهم .



_ ماحدش ليه بيتكلم لما بيشوف البنات إلي واقفة وقاعدة في أوضاع مش محترمة مع الشباب على الكورنيش وفي الحدائق العامة والمواصلات وبيروحوا البيت البراءة في عيونهم قدام أهاليهم ولا الغلط صح والوضع مقلوب .. ولا الشرطة مابتأخدهمش ليه على أي قسم وبتتصل بأهلهم وتتعهد عليهم بحسن تربيتهم لأنهم يخدشون الحياء العام ده لوفيه حياء من أصله .. ولو ملهمش أهل يبقى فيه إجراءات تانية ولا منظرهم حلو .

_ الدفاع عن النفس والعرض والسمعة مش محتاج ان البنت تبقى محجبة أوغير ، بنت أوولد ، مسلمة أوغير، مصرية أو هندوسية ،الدفاع عن الجسم والنفس نتاج نفس سوية ترفض السؤ والقبح ونتاج تربية سليمة وارتباط بالدين والعادات والتقاليد .

_ مين الي ورا الحملة المغرضة ديه مين إلي عاوز ينشر الفساد الأخلاقي على المشاع من غير مايكون فيه عقاب رادع ويستخبى تحت ستار الدين والدين برئ منه.




.. إن شاء الله حاكتب عن حقائق عشتها بنفسي ، وشفت اد ايه شعبنا شعب مظاهر وإشاعات وسلوك متخلف ومنحدر والمرحلة الي وصلنا لها وبنستخبى فيها ورا الدين واحنا ماينطبقش علينا غير مسلمين لقب وبس وشرقيين ،عندنا عادات وتقاليد على الورق وفي الرويات والأساطير القديمة بس .



.... حسبنا الله ونعم الوكيل ....





كلنا نهى رشدي




وللحديث بقية

هناك تعليقان (2):

Nabil يقول...

مش عارف اعبر عن اعجابى باراء حضرتك الحقيقه.

الشماعه بتاعت اصلها كانت بتتقصع,لايسه مش عارف ايه, بتقول ايه....الخ بقت شماعه سخيفه وقديمه.

حاجه غريبه هو لم تكون حتى اسرائيليه...تبقى التحرش بيها حلال؟؟!!

ولم تكون مش لابسه حشم- مع انه غلط- مينفعش برده حد يعاكسها.

لان ربنا سبحانه وتعالى ركبلنا مخ دى مهمته((السيطره)).

شكرا علي الموضوع الجميل

ارق تحياتى

حياة بلا روح يقول...

بارك الله فيك يابشمهندس نبيل
ألف شكر على ارائك الممميزة والصائبة

للأسف احنا اهم شئ عندنا المظاهر وده يمكن عملت عنه إستفتاء للرأي في الشارع وسألت الناس مجموعة اسئلة وفوجئت بالرود معظهما متعلقة بمعتقدات غير سليمة بالمرة وعرفت ان هي ديه الأسباب الي وصلتنا للمرحلة الحالية ,

أسعدني مرورك الكريم
أطيب تحية