الثلاثاء، 11 نوفمبر 2008

احنا إلي سرقنا البلدوزر






في منتصف الثمتنينات اتسرق بلدوز حفر عملاق أثناء العمل في مشروع مترو الأنفاق من احد مواقع الحفر وطبعا الموضوع بقى يضرب بينا المثل وبقى لغز محير إزاي بلدوزر عملاق وبالحجم ده يختفي بسهولة جوة القاهرة ..





المهم النهاردة بكتب الموضوع علشان أهنيئ شعبنا وأقوله إن البلدوزر لاقوه في منطقة صقر قريش بالمعادي الجديدة التابعة لحي البساتين في آخر مرحلة من المساكن ناحية الأتوستراد وبتغطيه النباتات زي ست الحسن والنباتات المتسلقة ورحت شفته بنفسي .. بس إزاي بلدوزر بالحجم ده خرج من الموقع من غير ماحد يأخد باله .. المهم .. يظهر ان المقاولين الي بنوا المساكن مش بس غشاشين في البناء لأ دول سرقوا( في قاموس المصطلحات الحديث أستلفوه من ورا الدوله) .. بلدوزر حفر مترو الإنفاق علشان يكملوا بيه بناء المساكن ..





الكارثة إن البلدوزر حجمه عملاق جدا وهو بلدوزر إنشاءات وإلي كان مسئول عن التحكم في إدارته وتشغيله كان شديد الذكاء فركنه بجانب عمارة سكنية وساب البرج الحديدي للإنشاء معلق على الهوى فوق العمارة يعني في أي لحظة ممكن يهدم العمارة على السكان ..





المال الحلال عمره مايضيع ابدا ..




بالتأكيد المال الي الدولة اشترت بيه البلدوزر كان مال ناس غلابة وطيبة ومطوحنة فرجع لأصحابه بس بعد ربع قرن الله اعلم هما فين دلوقت ..






عقبال مانحل لغز إختفاء المواطنين إلي بيختفوا فجأة، والآثار ، والسيارات و المفقودين في حادثة العبارة السلام يمكن لما يظهروا يقولولنا هما كانوا مستخبيين طول المدة ديه في أعماق البحر أشلاء وسايبنا ندور عليهم ومش عارفين راحو فين بما أنهم مفقوديين ومش في عداد الأموات علشان أهاليهم يرفعوا قضية تعويض بعد سقوط مدة التقاضي ، وعقبال مانحل لغز إختفاء سفاح المعادي إلي لابس طاقية الإخفاء ودوخ الأجهزة الأمنية لغاية مانفسها أتقطع وبرده مش عارفين هو فين لغاية دلوقتي من سنتين مع إن حل اللغز سهل .. يمكن سافر أدغال أفريقيا يشتري قرن وحيد القرن لأنه مش مقنن كسلاح أبيض في القانون.. وغيره وغيره ..المهم .





قلت بس أزف البشرى الحلوة ديه علشان ماحدش يظلمنا ويبقى إحنا إلي رجعنا البلدوزر ..





وللحديث بقية





هناك تعليقان (2):

Nabil يقول...

السلام عليكم....

الموضوع جميل جدا ومتميز كالعاده .

علس فكره انا مش عارف ابطل ضحك يمكن فعلا "شر البلية ما يضحك"

انا اول مره اسمع عن الموضوع ده بصراحه

ربنا يخليك لينا بتعرفينا العجايب ..

هم كانوا بيدورا عليه ازاى؟؟؟
وايه مفهومهم عن البحث؟؟؟

حاجه بالحجم ده ومسروقه وبتشتغل داخل القاهره يعنى مش فى مجاهل افريقيا ويقولوا مش لاقيينوا.

سبحان الله...
حضرتك بتقولى
"بقى يضرب بينا المثل وبقى لغز محير إزاي بلدوزر عملاق وبالحجم ده يختفي بسهولة جوة القاهرة .."

هو اختفى؟؟ ده ياريت اختفى...

ده هم عاملين مش شايفينوا

وبعين هى الالغاز كترت كده ليه فى المعادى....؟؟؟؟ ^_^

ارق تحيه

حياة يقول...

نبيل
بارك الله فيك
على الكلمات الطيبة

وانا اول ماشفت البلدوزر قعدت اضحك لانه فعلا شئ يضحك يعني البلدوزر بحجمه العملاق وهو موجود على بعد خطوات قليلة من الحي ولسة مكتشفين مكانه

عندك حق هما فعلا عاملين مش شايفينوا
البلدوزر حجمة عملاق جدا ومختفي بقالة 25 سنة وعلى فكرة منطقة صقر قريش بتكتظ بالسكان والمواصلات من 10 سنين تقريبا وبالرغم من كل البلاغات برده كانوا عاملين مش شايفينه .

للأسف المعادي و المعادي الجديدة مابقتش زي الأول بتحيط بيهم مناطق عشوائية زي ترب اليهود وغيرها وياريت مناطق عشوائية سكنية وبس لكن بنشوف كل يوم الأسوأ.

والسبب فساد المحليات طبعا الي وصل لمرحلة متطورة من حماية كل شئ غلط
ودعم ومساندة كل ماهو سئ وتقنينه
وكل شئ بثمنه .. ودا ناتج عن عدم احترام آدامية البشر والسماح لهم بالسكن في العشوائيات ودا طبعا اهدار للآدمية وهي إلي وصلتنا للمرحلهالي احنا فيها اهم شئ هو ازاي يحصلوا على المقابل المادي فقط .

تسعدني دائما أرائك المميزة
ألف شكر لمرورك الكريم

أطيب تحية