الأربعاء، 5 نوفمبر 2008

امسكوا المجنون الي بيولع في مصر




تفاجئنا اليوم مع حلول الظهيرة بخبر حريق بمجمع المحاكم بالجيزة وفندق النيل بلازا ، وطبعا هما تكملة لسيناريو حريق القاهرة الثاني بالقطاعي .


من المصانع إلي بتتحرق زي مصنع جهينة ومصنع شيبسي ومصنع شبرا وحريق مجلس الشورى وبعده المسرح القومي بالعتبة

والمعهد القومي للأورام ، إلى مجمع المحاكم بالجيزة اليوم وفندق النيل بلازا والبقية تأتي .


وتشير الإحصائيات إلى أن عدد الحرائق في مصر بلغ ‏30‏ ألف حالة في السنوات الخمس الماضية وطبعا مش عارفين مين السبب ،وفي كل مرة الدنيا بتولع فيها نتهم فيها المسكين البرئ ( الماس الكهربائي ) .


وطالما أن الماس الكهربائي متسبب لنا في عقدة .. يبقى الأفضل نرجع لعصر ماقبل مائتي عام .. ونشغل لمبة الجاز في المصالح والمصانع علشان نعرف نقبض على المتهم وهو الجاز ، ولا نشتغل وننتج ونصنع على ضؤ الشموع ونبدل الماكينات للعمل اليدوي ونشغل العاطلين الي في المصالح والمصانع وإلي على القهاوي قاعدين .



الماس الكهربائي المتهم البرئ


كل حريقة تطل علينا نتهم فيها الماس الكهربائي ، وهذه كارثة بكل المقاييس لأن هذا الإتهمام معناه إنه لا توجد أجهزة إنذار سليمة في كل الأماكن الحيوية في مصر .. وإذا لم نتدارك الموقف بفعل حاسم وجدية .. ستأتي هذه الحرائق على الأخضر واليابس في يوم ما وتحصد أرواحا بريئة .. والفاعل حر طليق .



.. عرفتوا مين المجنون إلي بيحرق مصر ؟؟


وبما إنه لاتوجد مادة في نص قانون العقوبات تتهم أوتدين الماس الكهربائي أوتجرم أفعاله .. فستظل الحرائق ترتكب بإسمه ويستغلها أصحاب النفوس الضعيفة والضمائر الغائبة .


هو ده المجنون ..


.. الفساد والإهمال في آن واحد، هو الحق المهدور وعدم الشعور بالمسئولية ، هوإنهيار القيم والمبادئ من أجل ضياع الضمير وبيعة بأرخص ثمن .. ثمن بخس لايسمن ولا يغني ، هو عقاب البرئ وإطلاق سراح المتهم حر ليكرر جرائمه وهو يعلم أنه لن يعاقب .



والبقية تأتي

هناك 4 تعليقات:

MaNoO يقول...

تصدقى والله صعبان عليا الماس ده بقى لبانة على لسان كل واحد مزنوق فى حريقة يقول ماس ويخلص الموضوع الحرائق بتدق جرس انذار كبير جدا اننا خلاص بقينا فى خطر شكرا على مدونتك وتقبلى تعليقى المتواضع واتمنى التواصل فى المدونات

Nabil يقول...

احييى حضرتك علي موضوعاتك اللى بتعكس وعى كبير...وبهنى نفسى علي الظروف اللى مررتنى فى المدونه.
((والله بجد دى مش مجامله))

ياعينى علي الماس الكهربى...

انا حاسس ان بعد كده هيقولوا القطارات بتعمل حوادث بسبب الماس الكهربى.

والاطفال بتموت فى المدارس بسبب الماس الكهربى.

والحوادث علي الطرق بسبب الماس الكهربى.

والعنوسه بسبب الماس الكهربى.

وازمة السكن بسبب الماس الكهربى

رحم الله هذا المظلوم.

حتى الكهرباء لم تسلم من شائعاتنا.

حياة يقول...

مانو

ألف شكر لمرورك الكريم وتعقيبك

فعلا احنا وصلنا لمرحلة بقينا بنعلق أخطائنا على شماعة الماس الكهربائي وغمضنا عنينا بإرادتنا عن الحقيقة وديه أكبر كارثة بنعيشها .

ويسعدني التواصل مع اخواتي بالمدونات

بارك الله فيك

أطيب تحية

حياة يقول...

نبيل
بارك الله فيك
دائما يسعدني مرورك الكريم واخجل تواضعا أمام الكلمات الطيبة وتدفعني لأن ابذل جهدى كي أكون بمقدار حتى لو جزء صغير منها .


لوكان الماس كهربائي إنسان كان نطق ودافع عن نفسة لكن للأسف .. وكان وقتها حيبقى فيه متهم صامت آخر يبقى هو المسؤل عن كل الحرائق والمصائب إلي بترتكب بإسمه من أول حوادث القطارات إلى أزمة السكن .. رحم الله المتهم البرئ من العقول التي لا تتقي الله .. انا بس نفسي اعرف إلي بيرتكب جريمة مابيفتكرش ليه وقتها ان فيه يوم حساب وانه أمره بإيد ربنا وإن فيه أرواح بريئة بتدفع الثمن .. ياترى يوم الحساب برده حيقول لربنا السبب مش انا الي ولع الدنيا الماس الكهربائي .



ألف شكر على أرائك المميزة دائما

أطيب تحية