الخميس، 20 نوفمبر 2008

الأنانية والسلوك العشوائي هما المتهم الأول في حوادث المترو




رحم الله شهيدة مترو محطة حدائق المعادي وجعل مثواها الجنة وألهم والديها الصبر والسلوان


يوميات في مترو الأنفاق


_الأنانية والسلوك العشوائي في التسابق مين إلي يركب الأول والتدافع العكسي ناس عايزة تنزل وناس عايزة تطلع
مع إن مكتوب على الأبواب ( نزول ) و ( صعود ) لكن لا حياة فمن تنادي تتكاتل كتل بشرية الي يخبط وإلي تدفع بإيدها ورجلها علشان تطلع المترو مش مشكلة عنده إن فيه ناس عايزة تنزل وديه هي المشكلة إلي بنواجهها السلوك العشوائي لشعبنا وإلي لو بعد مليون سنة إن شاء الله حيفضل سلوكة زي ماهو عشوائي في كل شئ .


جهاز مترو الأنفاق

_ سائق المترو له خطأ واحد أنه مابيبصش في المرآه العاكسة إلي على المحطة ويتأكد إن كل الأبواب مغلقة من
لكن مانقدرش نلوم عليه في كل الحوادث إلي بتحصل و لأنه مطحون في المترو من الساعة الخامسة صباحا علشان يوصل الناس لمصالحهم ،وله وقت محدد للوقوف على كل محطة ولو أستنى كل واحد أو واحدة عقبال ماتطلع براحتها وتنادى على إلي معاها .. كانت حصلت كوارث تصادم مالهاش أول من آخر وبما إن شعبنا مابيعرفش قيمة الوقت فعاوز كل شئ بالراحة مش مشكلة هما وراهم حاجة .

_المترو من شهرين تقريبا اتعاقد مع شركة أمن خاصة واقفين شباب وبنات على كل المحطات تقريبا لابسين زي موحد واقفين بجانب ماكينات التذاكر
.. بيتفرجوا على الي داخل وإلي خارج من المحطات ويحرسوا ماكينات التذاكر .. بدل مايقفوا بجانب ماكينات التذاكر .. نخلي مهمتهم التأكيد والإشراف على سلامة الركاب وتنبيهم بالإبتعاد عن الأبواب مش هي ديه برده المهمة الأولى للأمن ولا مهمتهم الأولى الحفاظ على ماكينات التذاكر والبشر مش مشكلة .


ياريت نبطل السلوك العشوائي

_من أول قطع تذكرة المترو وكل واحد عاوز هو الي يقطع تذكرته الأول مش مشكلة الي واقف ولا الي واقفة قدامة اهم حاجة نفسه وبس وكأنه هو الإنسان الوحيد الي بيقطع تذكرة المترو لغاية مابنركب المترو بنظام الدفع العكسي ناس بتدفع نفسها لجوة المترو وناس عكسهم والشجاع الي يطلع أو ينزل الأول غير مباليين بوقت سائق المتر ولا بصفارة تنبيه غلق الأبواب ولا بأي شئ .

_دا بخلاف طبعا خانقة المترو وإلي الواحد بيشوفه فصوابعنا مش زي بعضها ، فمثلا تلاقي الي مش قادرة تسيب ابنها شاب كبير ولاجوزها .. وواخداه معاها في عربية السيدات غير مهتمة إن عربيات السيدات مخصصة لغرض هي حرية السيدة أو الفتاة أو تعرضها لموقف زي قطع في ملابسها أرضاع طفلها مش مشكلة عندها أهم حاجة هي وبس .

ياريت نبطل سلوك عشوائي كفاية أنانية إلي بيدفع الثمن أبرياء مالهمش ذنب .. أقول إيه !!!


وللحديث بقية

هناك 5 تعليقات:

أسير الجراح يقول...

مدونة فى غاية الجمال


سعدت بمرورى لمدونتك


اتمنى زيارتك



كل التقدير



اسير الجراح

Nabil يقول...

السلام عليكم...

يارب ما يحرمنا من موضوعاتك ابدا..

عارفه هاتضحكى لو قلتلك انا ساعت لم الناس بتقعد تتدافع بشكل غريب علشان يركبو بحب اتفرج علي تعبيرات وشوشهم المقترنه ببعض الجديه احيانا كانهم محاربين فى الميدان

واحيانا مع ابتسامه غريبه مختلطه ببعض الغباء والبلاهه -اسف لتعبيري-

وحتى لم يبقى المترو فى اول محطه يعنى المترو كده كده هيوقف اكتر من عشر دقايق

بس الظاهر ان التزاحم ده بقى عاده وطبع مش فى المترو بس حتى لو كانت الناس مش كتير برده فى زحمه ...لان الناس نسيت يعنى ايه نظام ومبيهماش الا نفسها.

وبعدين مرايات ايه اللى المفروض السواق يشوف فيها الابواب.

ده عيب فى حقنا والله....فى اوتاميتك كنترول وفى انذار و كمبيوتر واداره اليه...
الحاجات دى مش صعبه ولا معقده والله. دى دراستى والاف غيري طلبه ومهندسين قوى كهربيه وتحكم بالمئات فاضيين ولسه فى المرايات!!!!!
يا نهار ابيض .

الف تحيه علي موضوعاتك وارق تحيه ودعواتى بدوام التميز والابداع

حياة يقول...

أسير الجراح
بارك الله فيك
أهلا بك في مدونتي

ألف شكر على الكلمات الطيبة وعلى مرورك الكريم

ويسعدني التواصل مع أخوتي دائما بمدوناتهم


أطيب تحية

حياة يقول...

نبيل
بارك الله فيك

تسعدني دائما أرائك ومناقشتك المميزة


عندك حق وصف دقيق فعلا كأنهم محاربين في ميدان في الميدان .. والله بضحك فعلا لأني كمان بقف اتفرج زيك وساعات مابركبش
المترو الا بعد مايمر ثلاثة واربعة مترو علشان اتفرج على التعبيرات الي على وشهم وهما بيدفعوا بعض .
المشكلة والي بيتحرق دمي منها أن مكتوب صعود من جهة ونزول من جهة ولو قلت لحد الكلام ده يعني مثلا تعالوا على جنب علشان ننزل والله ولا بيسمعوا هما هدفهم الحرب بالحركة البطيئة من غير احساس بالي حواليهم ..بس فعلا شعبنا بيحب الزحمة أنا اعتقد لو مافيش زحمة
شعبنا ممكن يحصل له حاجة .

لو تعرف اد ايه بيتصرف على الأجهزة من صيانة وللأسف كلها واردة من الخارج على الورق طبعا و بيتصرف على حاجات ملهاش لازمة . مع ان المهندسين المصريين يقدروا يعملوااجهزة متطورة عن الي موجودة والدليل على كدة براءات الإختراع إلي الي بتترفض وبتشتريها الدول الأجنبية لو اتعرضت عليها..تفتكر لو المهندسين المصريين صمموا اجهزة انذار والكترونيات عالية الجودة .. يبقى كدة المستوردين حيخسرواالأجهزة المضروبة الي بتييجي على اساس انها اجهزة انذار والكترونيات عالية الجودة والنوع بس حنقول ايه .

ألف شكر على مرورك الكريم وكرم الكلمات الطيبة.

أطيب تحية

عبد اللطيف الراشدي يقول...

جامعة المدينة العالمية
http://www.mediu.edu.my/ar/
المكتبة الرقمية
http://dlibrary.mediu.edu.my/

تمثل المكتبة الرقمية لجامعة المدينة العالمية من أبرز الصور الداعمة للبحث العلميللدارسين والمتخصصين والباحثين في شتى فروع المعرفة؛ حيث تضم أكثر منخمسين ألف مرجع، تغطي كافة التخصصات الأكاديمية، وتقوم بالتحديث المستمر لهذا المحتوى؛ مما يحقق تراكمًا معرفيًا ضخمًا على المدى البعيد.
الرؤية:
إتاحة قاعدة عريضة من المعلومات والبحوث العلمية المسموعة والمقروءة لخدمة الطلاب والباحثين المعتزين بالقيم الإسلامية القادرين على مواجهة التحديات، والمشاركين في نهضة المجتمعات.
الرسالة:
تقديمالخدمات المكتبية الرقمية والمصورة والمسموعة المتكاملة.
الهدف من المكتبة الرقمية:
1.نشرالرصيدالعلميفيسائرفنونالعلموالمعرفةوتعميمهبأسلوبيحققالفائدةالعلميةالمرجوة.
2.توظيفالتقنيةالحديثةوالاستفادةالقصوىممّاتُتيحهمنإمكاناتهائلةفيمجالالمكتباتوبالأخصالشبكةالعالميةللمعلومات “الإنترنت”.
3.خدمةالدارسينوالباحثينفيشتّىبقاعالأرضبمايُوفِّرعليهمالجهدوالوقتفيالتصفّحوالعرْضوالبحثبطريقةعرْضتتناسبمعالمعاييرالعالميةللمكتبات.
4.التعاونوالمشاركةوالتسويقالمتبادلللمواردالمكتبيةمعالجهاتالمختصة.
موقع المكتبة الرقمية
http://dlibrary.mediu.edu.my/