الأسبوع الي فات أتصلت بيا صديقتي وهي مندهشة و قالت لي ؟
مش البلح بقى بيكركروه !!!
بيكركروه .. إزاي ؟؟
إشترينا بلح زغلول احمر بس لونه احمر جميل وبصراحة عاجبني لونه أحمر دم غزال غامق روعة
ولماروحت قلت اغسله وانا بغسله طلع لون احمر زي الكركديه وبعد كدة لقيت البلح
بقى حته حمرا غامق وحته حمرا فاتح بعد ماكان لونه كله أحمر غامق يظهر مكررينه وحطينه له كركديه ولا صبغة حمراء علشان يبيعوة بأعلى من سعره .
معقول !!!
حتى الغش وصل لصبغ البلح !! لاحول ولا قوة الا بالله ، نفسي اعرف بس .. غلاء اسعار وامراض وبرده الجشع والغش مبيفارقهمش ولابيتقوا ربنا .. الله يرحمنا برحمته ياترى فيه ايه بعد كدة .
اشتريت بلح مكركر
بعد ماعاجبني حجم ثمرة البلح هي طبعا عريضة عن البلح الزغلول الأحمر الطبيعي ولونها احمر داكن دا بلح تصدير يا أبلة شوفي حجم البلحة ولونها .. وماافتكرتش كلام صديقتي عن البلح المكركر إلا لما جربت بنفسي وطبعا روحت البيت بالبلح الزغلول المكركر.
ومن عادتي غسل أي خضار أو فاكهة بالخل مع الماء ، أنا نقعت في الماء والخل البلح الأحمر من هنا وطلع منه لون احمر داكن عامل زي الكركديه في المية من هنا والبلحة بقى لونها احمر فاتح ؟ دا ايه ده كركديه ولا لون صناعي ؟ طيب وحيستفادوا من صبغ البلح ايه ؟ وكام بني أدم غسله وأكله بقشره من غير مايأخد باله من الصبغة الموجودة عليه .
وبلح بيزيتوه
وبعد درس البلح المكركر .. عرفت انهم كمان بيدهنوا البلح الأحمر الزغلول زيت علشان يلمع ويقولوا برده نفس الكلام أنه بلح تصدير .. وطبعا ماحدش يعرف ايه نوع الزيت والي بدرجة 150 % زيت المطاعم المغلي .. وبدل ما المطاعم تتخلص منه
بيبيعوه بمبالغ زهيدة للجشعين .. وبألف صحة وعافية على صحة الشعب المصري.
من غشنا فليس منا
لا رقابة غذائية ولا صحية ولا تسعيرة للسلع ولا حياة فمن تنادي .. صحتنا في إيد ناس جشعين غابت ضمايرهم وبيعملوا الي هما عاوزينه طالما عارفين أقصر طريق للغش والفساد ونسيوا إن الله سبحانه وتعالى رقيب على أفعالهم ..حسبنا الله ونعم الوكيل .
الشئ الوحيد الي تأكدت منه هو أني غسلت البلح المصبوغ كويس .
ولقيت الحل
قشارة البطاطس جنب طبق البلح المكركر ويتقشر قبل ما يتاكل
ماحدش ضامن بعد مايأكله بقشره إيه إلي ممكن يحصل له من الكركرة
وللحديث بقية
المشاركات
هناك 4 تعليقات:
ومقشرة بطاطس ليه؟؟
بلاش بلح خالص...!!
والله حاجه غريبه الناس بتفنن فى الغش وذكائهم بيظهر بوضوح
اما فى اى حاجه تانيه........
السؤال المحير.
هناكل ايه بعد كده؟؟؟
اطيب تحيه علي موضوعات حضرتك الرائعه
صديقتى العزيزة
من غشنا فليس منا
ليتهم يفهمون معناها الحقيقى
لتبدل حالنا كثيرا عما نحن فيه
تحياتى
نبيل
بارك الله فيك
ألف شكر على أرائك الصائبة دائما
الغش بقى سمة اساسية في التعامل وبنكتشفه للأسف متأخر جدا ، انا بسأل نفسي سؤالك حناكل ايه بعده كده طالما كل شئ مش مضمون ، بس فيه قواعد بسيطة لو اتبعناها حنقدر نتخلص حتى لو من 30 _ 40% من الأضرار بس لوقدرنا نكتشفها مع اساليب الغش المتزايدة .
أسعدني مرورك الكريم
أطيب تحية
أسعدني مرورك الكريم
أطيب تحية
الأزهري
بارك الله فيك
ألف شكر على أرائك الصائبة دائما
للأسف احنا افتقدنا اهم شئ وهي محاسبة النفس علشان كدة وصلنا للحال الي احنا فيه ماحدش بيحاسب نفسه ويعرف ان الدنيا دار اختبار وبيتبع اهواء نفسه .
أسعدني مرورك الكريم
أطيب تحية
إرسال تعليق